LUYO sa pagpanukad alang sa hosting sa National Prisaa 2019, way problema matod pa ang Davao City sa paggunit niini dakong torneyo nga posibleng himuon sa Abril 22 hangtud 28 sa University of Mindanao (UM) Matina Campus.
Atol sa Davao Sportswriter Association (DSA) Forum didto sa 2nd floor SM City Davao Annex, kini ang gibutyag ni Prisaa Executive Director Joaquin Sarabia adlaw’ng Huwebes, “We preparing Prisaa April 2019, wala man mi problema diri sa Davao City especially sa technical aspect kay kompleto man ang Davao og NSA's. Sa venues, wala pod ug sa mga billeting area unlike sa uban area nga gihimo ang nasyunal mao kasagaran nila problema,” pagpasigarbo ni Sarabia.
Nagpasalamat sab si Sarabia sa lokal panggobyerno sa Davao sa pagsuporta sa pag-host sa siyudad, “the support and approval sa City Mayor naa, pasalamat ko kay nisuporta siya. Ingon pa nga kung duna problema, isulti lang sa iyaha.”
Anaa sa 6,000 hangtud 7,000 ka atleta ang magtigi sa 18 ka events ang tigian diin ang athletics, softball, volleyball, basketball, soccer ipahigayon sa UM Matina; ang boksing sa Panabo City ug ang swimming ug beach volleyball sa siyudad sa Tagum samtang ang uban duwa himoun sa pipila ka malls ug tunghaan sa dakbayan sa Davao.
Matod pa ni Sarabia nga naghinam-hinam na ang tanan ilabina ang mga lagyo rehiyon tungod gusto nila makakita ug mobisita sa balay ni Presidente Rodrigo Duterte, “expect nga modaghan ang motan-aw sa balay ni President kay mao gyud ilang gusto.”
Samtang karong umaabot Septyembre 14 ipahigayon ang ikaduhang pagpulong sa mga tanan Presidente sa asosasyon sa mga rehiyon didto sa The Royal Mandaya Hotel aron mapinal na ang tanan detalye alang sa matag tuig kompetisyon. (Marizz R. Perez)