NAGPADAYON ang pagpanubay sa kapulisan sa Tagum City Police Station labot sa pagpusil patay sa duha ka babaye sa managlahing dapit sa dakbayan, Agosto 2, ning tuig.
Sa report nga nahagpat, unang biktima giila nga si Sheryl Ann Sasaki, 38, nagpuyo sa Apokon, Tagum City.
Mga ala una sa kaadlawon, dihang panaug na si Sasaki sa iyang sakyanan gikan sa iyang biyahe sa Metro Manila, kalit lang siyang gipusil sa wala mailhing suspek.
Nasayran sa dugang pagpanubay sa kapulisan nga nagapa-utang og kuwarta ang biktima diin tungod niini nakadawat siya og mga hulga sa kinabuhi, apan ang maong anggulo padayon pang gisubay sa kapulisan.
Sa pikas bahin, nakabsan sa kinabuhi samtang gidala sa Davao Regional Medical Center (DRMC) ang usa ka giingong hilot.
Biktima, nga taga Purok Dahlia sa Visayan Village, Tagum giila nga si Leonila Entino.
Subay sa imbestigasyon nga samtang nangape ang biktima sa ilang balay mga alas sais sa buntag, usa ka wala mailhing lalaki ang miabot, dayon pusil kaniya.
Ang duha ka insidente sa pagpamatay sa siyudad, padayon pang gisubay sa mga personahe sa Tagum PNP.