LIBUAN ka mga Sugbuanon ang nakapahimus sa Passport on Wheels nga programa sa Department of Foreign Affairs (DFA) uban ang Office of the Presidential Assistant for Visayas (OPAV) didto sa Oakridge Pavilion, A.S. Fortuna, dakbayan sa Mandaue sukad niadtong Martes nga natapos kagahapon.
Matod ni Sec. Micheal Dino sa OPAV nga mga 4,000 ka mga Sugbuanon gikan sa nagkadaiyang local government units ang nakapahimus sa duha ka adlaw nga programa.
“Ang objective aning Passport on Wheels gyud is to make it very convenient for people to get their passports,” ni Dino sa dihang nahinabi sa mga tigbalita.
Dugang niya nahimong posible ang pagdala sa Passport on Wheels sa Sugbo sa tabang ni Special Assistant to the President Bong Go ug Sec. Alan Peter Cayetano tungod sa daghang mga yangungo sa mga netizen nga nireklamo sa iyang buhatan nga moabot pa og unom ngadto sa pito ka buwan usa makakuha og schedule online ang usa ka aplikante sa passport sa DFA.
Paambit ni Dino sa mga tigbalita nga unang gibisita ang Cebu sa Visayas sa maong programa. Sunod bisitahon sa DFA ug OPAV mao ang Garcia ug Dauis, Bohol.
“We are actually bringing it closer to the people especially those who are far from the consular offices..,” ni Mina Ganzon, principal assistant sa DFA. JPP