TULO ka mga ganti ang nadawat sa dakbayan sa Lapu-Lapu atol sa labing uwahi nga Grand Nutrition Awards sa National Nutrition Council (NNC) 7.
Kagahapon, atol sa ika-14 nga Regional Nutrition Action Officers (NAO) Congress sa NNC 7 gi-award na ang mananaog sa 2018 Grand Nutrition Awards nga giorganisa sa Regional Nutrition Committee.
Nanghawod ang dakbayan sa Lapu-Lapu human tulo ka ganti ang nadawat niini, lakip niini ang Green Banner Award isip Outstanding City in the Region, ang Barangay Pajac isip Outstanding Barangay in the City of Lapu-Lapu and in the Region, ug taga Pajac usab si Sarah Fuentes kinsa gipasidunggan isip Regional Outstanding Barangay Nutrition Scholar.
Nasayran nga mas gipalapdan pa sa kagamhanan sa dakbayan sa Lapu-Lapu ang pundo niini alang sa nutrisyon sa mga bata diin nisaka ang budget niini sa P2 milyones gikan sa P1.5 milyones.
Mas niubos usab ang kaso sa malnutrisyon niini gikan sa 1.1% niadtong 2015 ngadto sa 0.8% nalang niadtong 2017.
Matod ni Dr. Agnes Cecile Realiza, city nutrition action officer sa dakbayan sa Lapu-Lapu, nga nangahatag sila og micronutrients sa mga bata, iron alang sa mga tinun-an ug ang pag-atiman sa mga mabdos nga inahan, ang ilang gihimo aron maminosan ang malnutrisyon sa bata nga nagpangidaron og 0-59 ka buwan. HBL