GIPASLANG ang pamunoan ni Pres. Rodrigo Duterte tataw nga ang maong lakang usa ka nasodnong kisaw sa 2019 ug 2022 nga bugnong lugaynon.
Singgit sa grupo nga ilang tahasan sa pagpangulo si Vice Pres. Leni Robredo. Ang Tindig Pilipinas, Akbayan, Magdalo ug LP naghiusa sa ilang tingog batok ni Pres. Rodrigo Duterte bahin sa drug war, charter change, heroes burial, patay, culture of violence, kakabos, pagsaka sa presyo, dakong utang, plano nga mangutang og P1.19T nagkagrabi nga problema sa trapiko ug wala manghingusog sa katungod sa mga Pilipino nga makapanagat sa Panatag Shoal. Nakita sa oposisyon nga dakog natabang sa mga kabos si Robredo pinaagi sa pakigtambayayong sa mga pribadong sektor ubos sa iyang Angat Buhay Program.
Apan si Duterte kansang administrasyon gipunting usab sa kabulahanan sa mga kabos mihulagway ni Robredo nga incompetent o dili haom nga mangulo sa nasod. Tunog na usab nga mosakbang ni Robredo sa 2022 si Davao City Mayor Sara Duterte-Carpio.
Gitahasan sa oposisyon si Robredo sa paghiusa sa ilang tingog kay dili makapangulo ang mga senador ug kongresista kay daghan ang nagpasilong sa mayoriya, dili kang Sen. Leila de Lima kay nabilanggo sa Camp Crame, dili kang Sen. Antonio Trillanes kay misalom ang popularidad ug dili kang Sen. Riza Hontiveros kansang gisentro sa pamolitika wala makahumot sa publiko.
Si Sen. Francis Pangilinan, presidente sa LP mibutyag nga ang minoriya sa senado moumol og resistance slate. Gipalutaw sila si Sen. Bam Aquino, Jose Manuel Diokno, Lorenzo Tañada III, Magdalo Rep. Gary Alejano, Agot Isidro ug kanhi Akbayan Rep. Barry Gutierrez nga karon legal adviser ni Robredo.
Sa Pulse Asia Survey sa Hunyo 2018 sa gihugon-hugon nga managan og senador nga naapil sa top 15 mao sila si Grace Poe, Pia Cayetano, Cynthia Villar, Sara Duterte-Carpio, Sonny Angara, Jinggoy Estrada, Ronald dela Rosa, Koko Pimentel, Nancy Binay, Serge Osmeña, Lito Lapid, JV Ejercito, Bam Aquino, Imee Marcos ug Herbert Bautista. Tangason pagka senador sila si Robin Padilla, Mar Roxas, Bong Revilla, Gloria Arroyo, Bong Go, Harry Roque, Vitaliano Aguirre, Mocha Uson, Freddie Aguilar, Rodolfo Fariñas, Alfredo Benitez, Geraldine Roman, Karlo Nograles, Francis Tolentino ug Pantaleon Alvarez. Samot si Alvarez kay nahisama ni Senate President Pimentel nga gitaktak.
Ika-45 sa palibot ni Duterte si Alvarez nga gilangkatan sa katungdanan gumikan sa panagbikil nila ni Rep. Tony Boy Floirendo, Gen. Ronald “Bato” dela Rosa, BOC Chief Nicanor Faeldon, Sec. Adelino Sitoy, Rep. Gloria Arroyo, Pimentel ug Davao City Mayor Duterte-Carpio. Pagkasayo sa nasodnong kasikas, Nahinumdom ko sa sanglitanan “early bird catches worm”.