MANAGHIGALA nga parehong ex-convicts kinsa gikan namilar, mao na sab ang gibilaran human girakrakan-patay sa riding-in-tandem sa Cebu International Convention Center (CICC), Reclamation, dakbayan sa Mandaue niadtong Huwebes sa gabii.

Ang duha gikan niduaw sa haya sa CICC compound nga gihimong evacation area sa mga nasunogan, diin gihaya si Pascual Villarba Jr., 34, kinsa gipusil-patay usab sayo ning semanaha samtang nagtambay sa guard house sa CICC diin kasamtangan kining nanimuyo.

Patay dihadiha ang mga biktima nga sila si Ropil Noval Norvaso, hingkod, taga Binaliw, dakbayan sa Sugbo ug Ricky Andujar, hamtong na, human sila gipamusil pasado alas 11:00 sa gabii.

Matod ni PCInsp Aldrin Villacampa sa Station 1 sa Mandaue City Police Office (MCPO) nga padayon pa nilang giimbestigaran ang motibo sa pagpamusil apan dako ilang pagtuo nga ang insidente adunay kalambigitan sa iligal nga drugas.

Sutaon pa sad sa kapulisan kon unsa ang relasyon sa duha ka mga biktima ngadto ni Villarba.

Si Villarba kinsa bag-o lang nakagawas gikan sa prisohan sa kasong pagpangarnap gipusil-patay sa riding-in-tandem niadtong Martes sa gabie.

Atol sa insidente niadtong Huwebes sa gabii, si Villacampa nagkanayon nga sila si Norvaso ug Andujar paingon na unta mogawas sa CICC compound sakay sa Honda XRM nga motor (GC 60069) sa dihang kalit nga nibutho ang duha ka mga nag-bonnet ug helmet nga galakaw paingon sa mga biktima.

Unang gipusil mao si Norvaso kinsa napatay diha-diha.

Si Andujar sa laing bahin nagkaratil og dagan palayo sa gate ug nibalik sa CICC.

Daling nikatkat ug nilayat sa koral si Andujar aron makaipsot sa CICC compound diin gipusil iyang kuyog.

Tuod man, laing lalake nga nakataptap ang nag-atang nang daan ni Andijar sa AS Fortuna Extension duol sa barangay hall sa Brgy. Guizo.

Didto na gipusil ang biktima sa makadaghang higayon hinungdan sa iyang kamatayon.

Sumala ni Villacampa nga base sa ilang pakisusi, si Norvaso nabilanggo na niadto sa kasong reckless imprudence resulting to homicide and damage to properties samtang kanhi piniriso sad si Andujar sa CPDRC nunot sa kasong illegal drugs ug kini sab ang gituohang suspek sa pagpanulis-pagpatay sa usa ka biktima didto sa Brgy. Pagsabungan sa dakbayan niadtong 2012.

Sa dugang pakisusi sa Centro Police Station 1, si Villarba usa ka tulak sa drugas ug maoy tigpamaligya og gituohang shabu sa construction workers sa padayong gitukod nga dakong hotel sa North Reclamation Area.