DAGKONG premyo nga salapi ang nagpaabot sa mga mananaug sa 33rd Kadayawan sa Dabaw Festival “Dula Kadayawan,” o nailhang Tribal Games, nga himuon, Agosto 17 sa People's Park, dakbayan sa Davao.
Ang organizer Tomas Jose Iñigo nagsulti niini, Huwebes, sa Davao Sportswriters Association (DSA) Forum nga gipahigayon sa The Annex sa SM City Davao.
Dugang pa nga ang Sports Development Division-City Mayors Office (SDD-CMO) mipadako sa premyong salapi sa overall champion ngadto sa P80,000.
Ang mosunod nga duha ka mananaug, modawat og P70,000 ug P50,000 samtang ang consolation prize anaa sa P30,000 nga ihatag sa fourth ug fifth placers.
“Grabe ngayon ang support for the tribal games compared to last year,” dugang ni Iñigo.
Mapasalamaton sab ang opisyal sa suporta nga gihatag sa Kadayawan Execom ug SDD-CMO.
Mga mananaug modawat sab og medalya.
Mga tribu sa lumad nga Bagobo Tagabawa, Bagobo Klata, Obu Manovu, Matigsalog ug Ata magtigi sa 10 traditional tribal games apil na dinhi ang siklo, bibinayo, rice pounding, karang, sosakoro, kokasing, tug of war, pana, salupot ug bubuntog.
Mga Muslims o Moro tribes nga gilangkuban sa Iranun, Kaagan, Maranaw, Maguindanaon ug Sama motigi sa sipa salama, sipa sa manggis ug tug of war.
Gidugang ni Iñigo nga himuon sab ang traditional tribal ritual.
Ang Dula Kadayawan ginahimo matag tuig aron saulugon ang abunda nga kultura sa mga lumad ug Moro sa siyudad. Adam B. Morrell