DEPENSAHAN ni Banjo Norte kinsa nagbase sa Cebu ang iyang korona sa Asian Elite sa Regent Aguila Ironman 70.3 Asia Pacific Championship karong buntag didto sa dakbayan sa Lapu-Lapu.
Di mominos 2,500 ka mga triathletes gikan sa 50 ka mga nasod ang moapil sa 1.9 kilometros nga lumba sa langoy, 90 kilometro nga lumba sa bisiklita ug 21 kilometro nga lumba sa dagan kinsa maoy magtigi sa pro-division, Asian elite, age group division ug relay.
Tinguhaon usab sa Rider Omega Triathlon Team nga ilang subli nga malangkat ang men’s elite kinsa bidahan sa mga kampiyon na silang August Benedicto, Paul Jumamil, Jorry Ycong, John Philip Duenas, Arland Macasieb, Xterra pro nga si Joseph Miller, Raymond Torio ug Leonard Rondina.
“I feel some pressure as a defending champion but I have prepared for this race. I trained hard so I can be on my best shape on race day,” matod ni Norte.
Ang kampyon sa Asian Elite nga si Norte, lumad nga taga Cagayan de Oro City, niingon nga mosandig siya sa iyang abilidad sa paglangoy ug bisiklita aron iyang malupig ang ubang triathletes kinsa kusog managan.
Iyang gihulagway nga pinaspasay ang sikad sa bisiklita sanglit duol ra ang rota ug minus ang hangin sanglit naglibot ra kini sa Lapu-Lapu ug Mandaue City.
“It’s important not to get complacent on the race because there are narrow roads. Just focus on the game,” matod ni Norte kinsa nahimong kampyon sa 2013 ug 2017 nga lumba.
Gipadayag ni Princess Galura, general manager sa Sunrise Events Inc. nga andam na ang tanan alang sa kompetisyon nga langkuban sa 3,000 ka marshals, police, navy ug medical staff lakip na ang security personnel.
Samtang ang giatngan sa tanan mao si Tim Reed sa Australia kinsa tulo na ka kahigayon nga nidepensa sa iyang korona sa professional category diin iyang ikalumba silang Xterra champion ug second placer sa miaging tuig nga si Mauricio Mendez, legendary triathlete Craig Alexander, kanhi Cebu champion Brent Mcmahon, Tim Van Berkel, Sam Betten ug si four time champs Caroline Steffen. RSC