GIINAT nila ni Mauricio Mendez sa Mexico ug Radka Kahlefeldt sa Czech Republic ang ilang kalampusan pinaagi sa pagdaog sa men’s ug women’s pro titles sa Regent Aguila Ironman 70.3 Asia-Pacific Championships kagahapon sa Shangri-La Mactan Resort & Spa sa Lapu-Lapu City.
Ang duha ka langyawng triathletes parehong gikan sa kalampusan sa Ironman 70.3 Davao niadtong Marso.
Si Mendez, kinsa Xterra world champion, mirehistro og tulo ka mga oras, 46 ka mga minutos, ug 45 ka nga segundos aron dag-on ang men’s pro title.
“If I would rate this race, this is on the top three races of my life. I don’t know how to describe how happy I am,” matod sa 22 anyos nga si Mendez, kinsa maoy naghari sa 2016 Xterra World Championships.
Si Mendez mihaw-as gikan sa dagat sa oras nga 25:16 ug ikaduha siya sa mga lalakeng partisipante sunod ni Kevin Collington.
Nahuman ni Mendez ang bike segment sa oras nga 2:03:55 diin kauban siya sa nag-unang grupo kauban sila si Tyler Butterfield, Braden Currie, Casey Munro, Luke Mckenzie, Mike Philips ug Tim Reed.
Sa lumba sa dagan, hinayhinay nga nakabiya si Mendez hangtod na sa hingpit niyang kadaugan.
Nagsunod kang Mendez mao si Butterfield, kinsa mitali og 3:47:38 samtang si Currie maoy ikatulo sa oras nga 3:48:13.
Sa iyang bahin, si Kahlefeldt nipatigbabaw sa women’s pro human niya natiwas ang 1.9-kilometer swim, 90K bike ug 21K run nga kompetisyon sa oras nga 4:12:13.
Human sa swim segment, si Kahlefeldt nahimutang pa sa ikatulo sunod nila ni Lauren Brandon ug Manami Iijima sa Guam.
Pagkahuman sa bike, nakaposisyon na sa ikaduha si Kahlefeldt sunod ni Brandon.
Mibulhot si Kahlefeldt sa run segment diin nabiyaan niya og walo ka mga minutos ang labing duol nga nagsunod kaniya.
Si Many-time champion Caroline Steffen (4:21:46) gisaka sa ikaduhang dapit human na-disqualify si Lauren Goss (4:20:12) gumikan sa blocking violation.
Ang niangkon sa ikatulong dapit mao si Melissa Hauschildt (4:22:50).
“I think it’s a great result. A championship title and in such strong field it’s even better. I had a great season this year, I love racing. I did not expect to win in this very strong field. I just tried to do my best,” asoy ni Kahlefeldt.
“It’s amazing to finish and win, and to finish with a happy baby and happy husband at the finish line.”
Ang 2018 Ironman 70.3 Asia-Pacific Championship gisalmutan og 2,500 ka triathletes gikan sa 50 ka mga nasod.
Sila si Mendez ug Kahlefeldt parehong naglaraw nga mosalmot sa Ironman 70.3 World Championship sa South Africa karong Septiyembre 1.
Nagplano sab si Mendez nga moapil sa 2018 Xterra World Championships. (RSC, ESL)