ANG ballistic test gihimo na sa mga otoridad ngadto sa mga armas nga bag-ohay lamang nakalutan didto sa probinsiya sa Maguindanao.

Sumala sa taho gikan sa Tactical Command Post sa 6th Infantry (Kampilan) Division sa Philippine Army nga banda alas 10:00 sa buntag, Enero 27, nakadawat sila og impormasyon gikan sa mga sibilyan nga dunay mga armas ug bala nga gipanglubong duol sa rancho nga gipanag-iyahan sa usa ka board member sa ikaduhang distrito sa Shariff Ampatuan nga nahimutang sa barangay Labo-labo, Shariff Aquak.

Abtik sab nga miresponde ang otoridad ug gironda sa hiniusang puwersa sa Criminal Investigation and Detection Group (CIDG-12) sa Maguindanao ug mga ginsakpan sa militar ang lugar.

Malampuson nga nakuha sa otoridad ang upat ka M14 rifles, lima ka M16 armalite rifles, usa ka Pal-Jet assault rifle ug nagkadaiyang matang sa mga bala.

Gipahayag ni Maguindanao Police Provincial Director Senior Superintendent Alex Linesses nga mga armas ug bala gipanag-iyahan sa mga special Civilian Volunteer Organization (CVO) ug Cafgu ni Board member Shariff Ampatuan.

Apan atol sa gihimong ronda sa mga otoridad wala makita ang naasoy nga opisyal sa iyang rancho.

Giklaro ni Linesses nga kuwatro mil pa ka private armed groups sa pamilyang Ampatuan ang ilang gipangita, 160 niini nalambigit sa mangilngig nga masaker.

Ila sab gisuhid ang mga hilit nga dapit sa Maguindanao human makabalita kalabot sa bodega nga puno sa armas ug bala.

Apil sa gi-imbestigahan karon sa CIDG-12 ang mga armas nga gi-isyu sa mga pulis sa Maguindanao nga hangtud karon padayon pang gipangita sa mga otoridad ug wala pa mabalik sa PNP-Armm. (Edgardo Fuerzas)