MIABANTE na sab ang audition sa unang Super B Idol sa Kantahan 2018 sa Brgy. Dumoy, Agosto 3 ning tuig.
Human nangita og mga Idol sa Kantahan sa Brgy. Buhangin Proper (Agosto 1) ug Brgy. Matina Crossing (Agosto 2), didto na sab sa may Dumoy nangukay og new talents ang Superbalita.
Atol sa audition, upat ka indibidwal ang mipatim-aw ug miharana sa ilang giandam nga mga awit.
Ang suki na sa mga kontest sa biritay, 45-anyos nga si Rolando Permangil ang usa sa miapil sa audition.
Wa sab patarog ang 19-anyos from Dacoville Subdivision nga si Denise Allana R. Adona.
Usa ka lumad from Cotabato nga kasamtangan ania na sa dakbayan, nga si Charlie James Gerommo, 21, mibirit sab sa Bakit ba Ikaw.
Wow sab ang rendition ni Celestino Antonio, 29 sa Farland Ext. Dumoy sa kantang Never Enough.
Ang upat maoy magtigi sa elimination round, diin ang mapili maoy mo-abante sa finals.
Human sa Barangay Dumoy, sunod nga duawon sa Superbalita Davao tim ang Barangay Mintal (Agosto 8); Barangay 22-C Piapi Boulevard (Agosto 9) ug Barangay Pampanga (Agosto 10).
Sa mga magpa-audition duol lamang kamo sa barangay sa mga lugar nga nahisgutan ug pangayo og registration forms kanila.
Mga rekisitos nga isubmit mao ang photocopy sa birth certificate, government/school ID, barangay certificate, lima ka masthead sa Superbalita (July 1-August 10 issue).
Bukas ang audition sa nag-edad og 18-45 anyos.
Sa finals, ang 3rd placer modawat og P3,000; 2nd placer P6,000 ug P10,000 ang kampeyon.
Apil na!