BUOT karon sa mga kabanay sa namatay'ng Overseas Filipino Worker (OFW) didto sa Beruit, Lebanon nga ipailawom pag-usab sa otopsiya ang patay'ng lawas ni Maria Theresa Seda, kinsa taga Barangay Poblacion Uno, Bansalan, Davao del Sur.

Sa pagsubay sa Sun. Star Superbalita kagahapon sa buntag, gikanayon sa magulang niini nga si Helen Miguel nga hangtod karon dili sila kumbinsido sa taho sa mga otoridad didto sa Lebanon nga ni-ambak sa building ang OFW nga miresulta sa iyang kamatayon.

Nagduda ang pamilya sa 28 anyos nga gituyo ang pagkahulog niini gikan sa ika-pitong andana sa balkonahe ni Youssef Hdeib, Khalife Building, Sanayeh, sa George Assi Street didto sa Beruit, Lebanon.

Subay sa taho gikan sa maong nasud, ni-ambak ang katabang niatong Enero 4 ug patay na kining nahiuli niadtong Enero 24 didto sa ilang dapit.

Niadtong Nobyembre 1, 2009 lang nilarga si Seda padong sa maong nasud pinaagi sa tabang sa Star Guide Agency didto sa Padre Faura Street, Ermita Malita.

Matod ni Miguel, di na nila makontak sa iyang cellphone si Seda gikan bulan sa Disyembre mao nga dako ang ilang panaghap nga gibinuangan kini.

Gusto nilang makumpirma sab ang sumbong sa mga kauban niining OFW nga gitukmod kini sa building.

"Sabi sa report sa Lebanon, nag-suicide daw at naglaslas pa ng blade, pero bali na nga yung dalawang pulso at muntik ng mahiwalay sa katawan, kaya ba ng blade yun," ni Miguel.

Nihangyo karon pamilya nga matabangan sa National Bureau of Investigation (NBI) aron subling imbestigahan ang kamatayon sa biktima sanglit matod pa nga nibalibad kanila ang Municipal Health Office (MHO) sa Bansalan nga mohimo og otopsiya gumikan kay kumpleto ang mga dokumentong nagpakita nga nahagbong kini, ni Miguel.

"Wala na kasi kaming pang-gastos sabi nila tutulong daw sa burial expenses yung employer niya but until now wala man, pati yung taga OWWA wala rin," dason ni Miguel.

Subay sa autopsy report sa mga otoridad sa Beirut, Lebanon, "Fracture and Internal Hemorrhage caused by falling," ang hinungdan sa pagkamatay sa biktima.

Apan buot sa pamilya nga mohimo ang gobyerno sa Pilipinas og mga lakang sa

pagsubay niini.

Dason sa pamilya nga daw napasagdan na sila karon kay bisan ang lokal nga gobyerno igo lang nihatag og gamay'ng tabang pinansyal. (Orlando B. Dinoy)