USA ka lalaki ang napalgang wa nay kinabuhi human gituohang nagpakamatay didto sa Purok San Antonio, Baca, Barangay Cuambugan, siyudad sa Tagum, Martes sa kaadlawon.

Giila ang biktima nga mao si Joseph Den Alabaracim, hamtung ang panuigon, ug molupyo sa susamang dapit.

Sa nakutlo nga report gikan sa blotter sa Tagum City Police Station nasayran nga pasado alas 2:00 sa kaadlawon, napalgan ang biktima sa iyang amahan nga si Romeo Albaracin nga wa nay kinabuhi ug nagbitay sa punoan sa sirigwelas.

Ang biktima giingong naghunos sa iyang kinabuhi pinaagi sa paghikot og t-shirt sa iyang liog dayon gibitay ang kaugalingon.

Gisuwayan pa og salbar ang biktima apan wa na gyud kini natabang.

Ang igsuon sa biktima nga si Sisame Villaren maoy mitaho dayon sa hitabo ngadto sa presinto sa kapulisan.

Sumala sa saysay sa kabanay sa biktima nga human namatay ang inahan sa biktima, kanunay na lamang kining maghinuktok, masulub-on.

Gituohan nga dili madawat sa biktima ang nahitabo sa iyang inahan hinungdan nga gikutlo sab niini ang iyang kinabuhi.

Kapulisan sa siyudad sa Tagum mihimo dayon og dugang pakisusi sa nahisgutang hitabo aron sayron kun duna bay foul play sa kamatayon sa biktima. (Marvin Pineda)