USA ka dalaga kinsa giingon nga hubog samtang natulog sa iyang lawak ang gilugos sa usa ka truck helper sa alas 2:00 sa kaadlawon kagahapon didto sa Crossing Bago Aplaya, siyudad sa Davao.

Ang biktima gitago sa Superbalita sa pangalan nga Cherry Mae, 23, private employee, lumad nga taga Barangay Tamayong, Calinan District ug nagpuyo atubangan sa Shell Gasoline Station, Barangay Bago Aplaya.

Base sa blotter sa Talomo Police Station, sa wala pa mahitabo ang pagpanglugos gihatud ang biktima sa iyang ka-board mate tungod kay hilabihang huboga niadtong higayona.

Si Cherry Mae giingon nga gipakatulog sulod sa iyang lawak ug mao na lamang ang iyang namat-an nga dunay tawo nga mikabayo kaniya.

Ang maong tawo giila sa biktima nga mao si Charlito (bansagon gitago sa Superbalita), 23, minyo, truck helper ug nagpuyo sa Malita, Davao del Sur.

Si Cherry Mae nangayo dayon og panabang sa iyang mga higala ug sa kapulisan mao nga nasikop sab ang suspetsado sa alas 3:00 sa kaadlawon kagahapon didto sa maong lugar.

Giandam na sa kapulisan ang kasong lugos aron ipasaka batok sa suspetsado ngadto sa korte. (AD)