Abyon nahagsa, 8 patay

WALO ka mga tawo ang namatay dihang nahagsa ang usa ka eroplano sa Philippine Air Force (PAF) nga gisakyan sa pipila ka opisyal sa militar mga alas 11:30 sa Huwebes sa buntag sa usa ka subdivision sa Cotabato City.

Kini ang pasiunang gipahibalo ni Lieutenant General Raymundo Ferrer, commanding officer sa Eastern Mindanao Command (Eastmincom) sa mga sakop sa media.

Ang eroplano (Nomad plane) migikan sa siyudad sa Davao, naghatud og usa ka opisyal sa Air Force didto sa Cotabato City, ug paingon na sa Zamboanga City dihang nahagsa.

Si Ferrer nagbutyag nga si Major General Butch Lacson, commander sa Philippine Airforce 3rd Air Division nga nakabase sa Zamboanga City, maoy usa sa mga opisyal nga sakay sa maong eroplano.

Si Eastmincom spokesman Major Randolph Cabangbang nagbutyag nga alas 11:35 sa buntag sa Huwebes, ang Nomad plane milupad gikan sa Awang airport sa Cotabato City ug padulong na kini sa Zamboanga.

"The plane suddenly encountered an emergency and crash landed," matud ni Cabangbang sa Sun.Star Davao.

Si Lieutenant General Ferrer nagsulti nga si Lacson ug ubang opisyal sa Philippine Air Force mitambong og meeting sa headquarters sa Eastmincom dinhi sa siyudad sa Davao niadtong Miyerkules.

Gitawagan sa Superbalita ang Tactical Operations Group (TOG) sa Northern Mindanao ug gikompirma niini nga migikan ang maong eroplano dinhi sa siyudad sa Davao sa alas 9:05 sa buntag ug milanding sa alas 9:55 sa buntag didto sa Cotabato City.

Mga piloto sa maong eroplano giila nga sila Captain Ordoñez ug lady pilot 1 Lieutenant Valdez.

Sa pasiunang report sa mga otoridad sa Cotabato, kompirmadong namatay nga lulan sa Nomad plane mao sila Major General Lacson, Major Tacoboy, 1 Lieutenant Lepae, Staff Seargent Mejia, Sergeant Lamera, Sergeant Gosum ug mga piloto nga sila Captain Ordonez ug 1 Lieutenant Valdez.

Mga sibilyan nga grabeng nasamdan mao sila Shiela Gumitom, Jane Gumitom, Roland Gumitom ug laing duha nga wala pa gikabutyag ang pangalan.

Si Cotabato City Mayor Muslimin Sema nagpahibalo nga ang tanang walo ka mga sakay sa eroplano namatay sa maong insidente.

"It was flying in zigzag mode and crashed. Nobody was hit on the ground. All the dead were on the plane," suma ni Sema sa pakighinabi kaniya. (GF/BOT/AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph