PADAYON ang mga pagpanulis nga nahitabo ning dakbayan sa Cagayan de Oro bisan asang dapit.
Si Police Inspector Evan Vias, hepe sa Anti-Theft and Robbery Section nibutyag sa Sun.Star Superbalita nga ang namatikdan ang pagsiaw sa pagpanulis ning panahona labina nga padangaton ang eleksiyon.
Apan gibutyag ni Vias nga base sa ilang namatikdan nga mosiaw ang maong kaso kung adlaw nga ting-sweldo sa mga empliyado ingon panahon sa pagtapos sa semana, ang adlawng Biyernes, Sabado ngadto na sa Domingo.
Nagpahimangno ang kapolisan nga magbantay usab sa mga panahon sa kadlawon tungod kay kini ang oras nga mogawas ang mga tulisan labina sa mingaw nga mga lugar. Ning mga orasa usab mahitabo ang pagpangransak sa kabalayan.
Mga ala 1:00 ngadto sa alas kwatro sa hapon namatikdan nga mao ang oras sa pagpanulis sa mga establismento ingon man sa mga trabahante niining mopaingon ngadto sa bangko.
Gani, ning panahona bikil alang ngadto sa mga operatiba sa ATRS labina nga dili sila mahimo nga magsul-ob og uniporme ug subay sa gimandong gun ban. Hinuon gihimoan na kini og paagi sa kadagkoan nga dili maapektuhan ang ilang trabaho.
"Kooperasyon lang sa katawhan dako na kaayo og tabang alang kanamong mga operatiba," ni Vias.