Luczon: Tigi's Tubig

MIBANHAW pag usab ang hugpong sa mga kooperatiba karong tuiga pinaagi sa Metro Cagayan de Oro Water Service Cooperative Federation (MCWS). Tumong sa grupo nga mo suplay og limpyo ug mainom nga tubig sa mga residente sa Cagayan de Oro.

Duna na sila'y plano nga mga barangay nga serbisyohan nga matud pa mokabat og kapin 14,000 nga mga myembro sa kooperatiba, labi na sa mga dapit nga nihit o kulang ang pagtagad sa kasamtangang tig suplay nga mao ang Cagayan de Oro Water District (COWD).

Tuig 2009 pa natukod ang pundok, apan karon lang nga mipatimaw inubanan sa subling pag duso sa ilang adbokasiya, nga dunay barato nga suplay sa tubig nga matagamtaman ang katawhan sa dakbayan, ug tanan kanila dunay katungod sa pagpanag-iya gumikan kay kooperatiba kini.

Sigun sa mayor nga si Oscar Moreno, iya kining gidawat nga lakang apan mipahimangno nga basin dunay mga legal nga mga isyu ang paga-atubangon sa grupo sa umaabot.

Ang pagkabanhaw sa MCWS nagpamatuod lamang nga dunay pahipi nga pagbabag sa bag-ong panagsabot tali COWD ug MetroPac. Lagmit nahimat-an sa maong grupo nga posible gayud nga motaas ang bayrunon sa tubig kung musugod nga kini og operasyon.

Kung tinuod man ang saad sa MCWS nga mohatag silag barato nga metro's tubig, posible nga daghan mohangyo nga mga residente nga mopataod kanila butang nga daghan ang mawad-an og konsumante ang COWD.

Busa, dili imposible nga dunay mobabag niini. Basin pa gani dunay mo sabotahe. Kwarta na gud ang gihisgutan niana: milyones, bilyones nga kantidad.

(Nefluczon@gmail.com)