GIHATAGAN og tagal si Mark Freeman, ang founder sa Freedom Traders Club o Plotous Coin, hangtod bulan sa Septiyembre ug ibalik niini ang mga gi-invest nga kwarta human sa gipahigayong hearing niadtong Agusto 3.
Nasayran nga gipatawag sa komitiba ni Kagawad George Goking, chairman sa Committee on Trade, Commerce and Industry sa konseho, si Freeman ang tag-iya sa FTC human nga nag-isyu ang Security and Exchange Commission (SEC) gumikan kay dili kini rehistrado sa ilang buhatan.
Sa pakighinabi sa SunStar Superbalita kang Goking, gibutyag niini nga ang pasalig ni Freeman matapos sa bulan sa Septiyembre ug giabisohan na kini pagpahunong sa ilang operasyon.
Nasayran nga nagpasalig si Freeman nga i–uli ang mga kantidad sa katawhan nga naghatag niini apan dili kini madali kay nag bogged down ang ilang sistema sa pagkakaron.
Buot ni Goking nga sa dili pa matapos ang maong bulan sa Sityembre, makapanday na og bala-od ang dakbayan aron proteksiyonan ang katawhan gikan sa mga susama niini nga mga panghitabo.
Samtang nanawagan si Goking sa katawhan nga dili magpadala sa mga pasalig ug sutaon una kong lehitimo ang sudlan nga negusyo.