KARONG Dominggo, naa si Miss Philippines-Universe 2016 Maxine Medina sa Cebu.
Kini aron i-promote ang pelikulang “Pinay Beauty (She’s No White)” nga usa sa mga official entries sa “2nd Pista ng Pelikulang Pilipino” nga magsugod na karong Agosto 15 hangtod Agosto 21 sa mga sinehan.
Gawas ni Maxine (nga artista sad ang papel aning salidaha), moabot sad ang ubang cast, sama nilang Edgar Allan Guzman, Janus del Prado ug Cebuana actress Chai Fonacier.
Ang mall show ipahigayon sa Robinsons Galleria Cebu mga alas 3 sa hapon.
TNT showdown
Tungod kay sold-out ang TNT (Tawag ng Tanghalan) All-Star Showdown sa Araneta niadtong July 28, plano kuno sa ABS-CBN nga dad-on sad ni dinhi sa Cebu.
Sigon sa atong tinubdan karong Sept. 21 ang target date nila. Wa pa silay venue, but with the same star cast nga langkuban nilang Sam Mangubat,
Froilan Canlas, Marielle Montellano, Pauline Agupitan, TNT Boys, ang mga grand champion nga silang Janine Berdine ug Noven Belleza ug uban pa.
Kon madayon, mao ni unang higayon nga mobalik og tungtong sa stage sa Cebu si Noven Belleza human siya nalamgibit sa pagpanglugos sa usa ka Cebuana nga contestant sad niadto sa TNT.
Duna kahay kaisog si Noven nga mobalik sa Cebu? Di kaha siya boo-han? Mao nay atong atngan.
Haypa
Kadungog na mo anang kantang “lahat ay sumayaw sige walang titigil/ halina’t magsaya sige walang pipigil... Boom nan a e-o e-o?/ na na e haypa!”
Tuig 2015 pa ni nisikat sa noontime show nga It’s Showtime pero hangtod karon kusog gihapon sa mga zumba ug diskohan ug bisan sa mga eskuwelahan.
“Haypa” ang taytul ani nga Filipino slang sa “Hayup ah” nga gikanta sa kaluhang MM ug MJ Magno kun “MMJ.”
Pirme ko makadungog ani mabuntag inig kahuman sa flag ceremony sa Jubay Elementary School sa Liloan kay mao ni ilang zumba. Sa ubang eskwelahan kay “Dura” kuno ilaha.
Pero mas nindot tingali dili palabian ang volume aron mas ma-appreciate ang tukar. Haypa! Haha...
Sagpa
Nindot og mensahe ang pelikulang Buy-Bust. Tinuod bitaw mao di gyud mawa ang problema sa druga sa atong nasud bisan daghan na kaayong nangamatay kay sila-sila ra man gud na diha puyra sa maayo.
Si Arjo Atayde sa katapusan na nigawas pero markado ang iyang mga dialog. Kon wa pa mo kakita tan-awa sa DVD.
Sagpa ning salidaha sa mga opisyal nga nagpatuong mga tigpatunhay kunohay sa kalinaw apan mao diay mga numero unong buaya. Haypa!