MOABOT ngadto sa P177 mil nga alang i-suweldo ang nabibitbit sa mga tulisan human nahitabo ang pagpanulis kagahapon mga alas 11:00 sa buntag sadalan JR. Borja-Tiano ning siyudad sa Cagayan de Oro.

Gikan nga nag-withdraw sa bangko ang duha ka nga trabahante nga mao sila si Goerge Sagario, 52 ug si Hazel Dacoco, dihang kalit lang nga gitulis sa tulo ka wala mailang lalaki sakay sa kolor blue nga XRM motorsiklo ug pulos armado og kalibre .45.

Nideklarar og tulis ang tulo ka mga tulisan ngadto kang Dacoco kinsa maoy nagbibitbit sa kwarta nga gikan pa nga gi-withdraw sa Rizal Commercial Banking Cosporation (RCBC).

Misukol si Sagario apan deretso kini nga gipusil sa mga tulisan sa tiyan nga bahin hinungdan sa pagkaligid niini.

Malampuson nga nakuha ang P177 mil, tseke nga mobalor og P1,500 ug personal nga kwarta ni Dacoco nga P800 human wala pa nakuntento ang mga tulisan gipusil pa sa tiil si Sagario aron masigurong dili na kini makagukod.

Ang maong kantidad alang i-sweldo sa mga trabahante sa kompanya sa Picmao sa lungsod sa Jasaan, Misamis Oriental.

Gidala ang biktima sa Polymedic General Hospital nga giingong luwas na sa makuyawng kahimtang ning panahona.

Sumla sa gihatag nga deskripsiyon, pulos mga batan-on ang mga tulisan nga gibana-banang nag-edad ngadto sa 20 pataas.

Samtang sa pagsulat ning balita padayon pa sa paghimo og dugang imbestigasyon ang kapolisan sa Police Station 1 sa Divisoria pangulohan ni Police Inspector Lemuel Gonda.