GIBALITA kagahapon nga pirmahan na ni President Rody ang Philippine Identification System Act (PhilSys). Naila usab kini nga "National ID System." Usa kini ka paagi sa pag-ila kung kinsa ang dili peke ug kolorum nga Pinoy nga nagpuyo sa Pilipinas.
Ablihi daw ang inyong bagang pitaka karon ug inyong makita kung pila ka buok ang ID. Seguradong naay usa o duha niining ID sa sulod sama sa: driver's license, SSS, GSIS, PhilHEALTH, Pag-IBIG, Voter's ID, Postal ID, cedula, Senior Citizen, company ID, school ID, Baptismal Seminar ID, Political Party ID, ug nagkadaiyang membership ID.
Wa pay labot ini ang ID sa kuwarta padala, discount cards, ATM, credit card ug uban pa.
Ang uban kay magdala pa'g passport aron dunay ipakita kung sitahon kay anaa pa kita sa Martial Law. Kung puwede pa lang ipapilit nato sa kuwadro ang atong tanang ID ug bitbiton bisan asa moadto. Mao kini ang gustong maremedyohan sa bag-ong balaod. Gawas tingali sa mga lisensiya og bank cards, himuong usa na lang ang tanang "government-issued ID." Mao na kini ang tinuod nga matawag nato nga "unified and consolidated government ID" nga maoy pangitaon sa tanang ahensiya ug pribadong buhatan aron maminusan ang "red tape" ug mopaspas ang serbisyo.
Dugay na kining gihandom sa katawhan, ilabi na ang mga Overseas Filipino Workers kay bisan unsang ID na lang ang ilang ginapakita sa nasud nga ilang sudlan.
Sa pagkatinuod si President Fidel V. Ramos nagpagawas na'g Administrative Order 308 niadtong 1996 aron maghimo og national ID system nga gibabagan sa Korte Suprema kay wala daw nisubay sa batakang balaod sa Pilipinas.
Niadtong 2005 nagpagawas sab og Executive Order 420 si kanhi Presidente GM Arroyo apan gibabagan gihapon sa samang rason sa Korte Suprema. Hasta ang mga militanteng grupo nibabag sa plano kay hadla kini sa seguridad og "violation of privacy" ilabi na nga mokuha ang gobyerno og personal nga datos ug impormasyon sa matag usa.
Ngilngig tuod kining balaura kay nahimong maabuso sa mga hiwi ug bungutong sakop sa kapulisan ug militar kung gusto nilang buhaton.
Sa laing bahin, dako usab kining tabang sa tawo aron mailhan kung kinsa ang peke, kolorum ug kriminal sa atong palibot. Subay sa balaod ang Philippine Statistics Authority ang magdumala sa implementasyon niini.
Sa akong tan-aw nindot kining maong balaod ilabi na kung gamiton sa kaayohan inay nga magamit sa pagpangharas ug pag-abuso sa tawhanong katungod sa katawhan - apil na ang mga kritiko sa gobyerno nga buot moduso og malinawong kausaban sa nasud.
Hinuon sulod sa balaod nga kinahanglang adunay "court order" kung kuhaon sa gobyerno ang personal nga datos sa indibiduwal. Mawala na kaha ang pekeng ID?