NILAMPOS si Kong. Tony Cuenco sa Cebu City south district sa pagpalabang sa Kongresso sa balaod nga maghimo sa Banawa-Englis nga bag-ong barangay sa syudad sa Sugbo. Kabahin ang Banawa-Englis sa Guadalupe nga matod pa ni Kong. Cuenco mao ang labing dakong barangay sa syudad ug sa Kabisay-an nga may 47,700 ka mga lumolupyo. Ang mahitabo, ang Guadalupe dunay 24,000 ka mga residente samtang ang Banawa-Englis dunay 23,700 ka mga residente.

***

Kon imong aninawon, ang Barangay Guadalupe mas daghan pag lumulupyo kay sa ubang mga lungsod sa lalawigan sa Sugbo. Kon mabuwag ang Banawa-Englis sa Guadalupe, mas dyutay na lang og mga lumolupyo nga atimanon ang mga opisyales sa Guadalupe.

Makahigayon sab ang taga Banawa-Englis sa paglansad sa pagka-opisyal sa bag-ong barangay aron maoy moatiman sa mga lumulupyo sa Banawa-Englis. Lakip na niini ang kaugalingong Barangay Hall, mga barangay tanod ug labi na gyud kanang mga trak sa basura nga mokuha sa ilang mga basura.

Click here for stories and updates on the Sinulog 2010 Festival.

***

Matod pa ni Kong. Cuenco, daghang babag ang giagian sa pagpalabang sa Republic Act No. 9905, “An Act Creating a Barangay to be Known as Barangay Banawa-Englis in the City of Cebu.” Ang katapusang labangon sa pagmugna sa Barangay Banawa-Englis mao ang plebisito nga gitakda sa Commission on Elections (Comelec) Pebrero 28, labi na ang pagpangita sa P1.458 milyunes nga gastuhon alang sa plebisito. Ang mga rehistradong botante sa Guadalupe ug Banawa-Englis igo lang mopili sa yes or no ug sa usa ka adlaw lang mahibaw-an na kon madayon ba ang pagkahimo sa Banawa-Englis nga usa ka bag-ong barangay sa syudad.

***

Nitaho ang Comelec nga malampuson ang ilang gihimo nga nasudnong dry run niadtong Miyerkoles alang sa automated election karong umaabot nga Mayo 10. Lakip ang lalawigan sa Sugbo sa maong dry run nga naglangkob lang sa napulo ka mga presinto.

“It’s very good,” matod pa ni Comelec Commissione Gregorio “Goyo” Larrazabal nga akong kanhi kauban sa Rotary Club of Metro Cebu. Manghinaot na lang kita nga unta ang mga botante ma-edukar ning bag-ong paagi sa pagbotar aron di maanugon ang ilang mga boto.

***

Kanus-a pa man kita motuo ug mosalig sa Comelec?

Nakapangutana ako niini kay dunay mga kandidato nga nipadayag sa ilang mga huna-huna nga wa sila mosalig sa Comelec, nga nahadlok silang tikason lang gihapon ang sunod nga eleksyon. Unya kon silay modaog, diha pa sila motuo ug mosalig sa Comelec?

Apan angay usab nga mangandam ang Comelec sa higayon nga mapalpak ang mga automated counting machines. Balik gud sa mano-mano. Bahalag maguday og ihap basta insakto.