BATA palang si Dr. Maria Elinor Kuizon Delfino, iya nang damgo nga mamahimong abogada, apan tungod kay wala siya tugoti sa iyang amahan nga motungha sa Manila, wala kini niya makab-ot.
Inay ma-abogada, nahimo siyang doktor nga nag-specialize og internal medicine.
Apan tungod usab sa usa ka aksidente, nausab ang dagan sa iyang kinabuhi kay usa na siya karon ka batid sa pagpagwapa ug pagpanindot sa lawas.
Nagmalampuson siya niini nga field.
Si Delfino, kinsa nag-specialize na karon sa aesthetic medicine, mao ang nanag-iya sa Erickelle Marie Frances Laser and Aesthetic Center nga nahimutang sa Robinson’s Fuente sa Cebu City midtown area.
Ang 49-anyos nga doktor nibutyag nga ginganlan niya ang iyang clinic sa ngalan ra usab sa iyang bugtong nga anak nga si Erickelle Marie Frances.
Sa wa pa nahimong doktor si Delfino ug tungod sa impluwensiya sa iyang amahan, gusto kaayo niyang mamahimong abogada apan dihang gusto siya nga mokuha niini sa Ateneo de Manila, wala siya tugti sa iyang amahan, kinsa usa ka electrical engineer.
Dihang nikuha na siya sa iyang pre-med nga Medical Technology, nagsige usab siya og plano nga mo-shift sa Political Science agig pangandam alang sa abogasiya, apan sa makadaghan nga higayon, wa mouyon ang panahon kaniya.
Nikuha siya sa iyang MedTech sa Velez College ug nigradwar niadtong 1991 dayon nipadayon siya alang sa iyang Medicine sa Cebu Institute of
Medicine ug nigradwar niadtong 1996.
Nipadayon siya alang sa iyang Internal Medicine specialization ug nigradwar sa 2005.
Apan niadtong 2006 dihang nag fellowship training siya aron mamahimong cardiologist, naaksidente siya sa bath tub sa ilang balay diin siya nakaangkon og severe disc herniation.
Nakausab kini sa iyang panglihoklihok.
Ka upat na siya gioperahan ug giabisohan nga motutok nalang sa iyang aesthetic medicine.
Wa siya mohunong sa iyang internal medicine, apan pili ra iyang dawaton nga mga kaso tungod sa iyang kahimtang karon.
Bisan sa iyang depresyon sa iyang nasinati, pursigido gihapon siya,nag-abli sa iyang unang clinic sa Gullas Hospital sa Banilad.
Niadtong 2015, gibalhin kini niya sa Country Mall sa Banilad apan tungod kay gioperahan na usab siya sa iyang spine, nanira sila sa 2016.
Karon niabli kini og balik ug aron duol sa iyang mga kustomer, anaa na kini sa Fuente Osmeña sa midtown sa Cebu City.
Matod ni Delfino nga wholistic ang approach sa iyang clinic diin mismo siya, hands-on sa iyang mga pasyente.
Gawas sa naandan nga mga IPL hair removal, facial, ug uban pa, mamahimo nga magpa-liposuction, acne stella, ug winback (face and body slimming/contouring/lifting) sa iyang clinic, siya mao ang labing una nga aduna’y advanced slimming body contouring treatment sa Sugbo.
Gibutyag ni Delfino nga padayon siya nga mohatag og bag-o nga teknolohiya sa pagpagwapa ug pampagwapo alang sa publiko.