GIAPROBAHAN sa konseho ang gipangayo nga P5 milyones nga pundo sa Cebu City Health Department para sa tuig 2018 aron ipalit og bakuna batok sa rabies.
Si Konsehal Mary Ann de los Santos, chairman sa committee on health, maoy nipalabang og resolution sa miaging regular session aron mahatagan og solusyon ang problema sa buhatan ni Dr. Alma Corpin.
Subay sa suwat sa pangulo sa City Health Department, moabot ngadto sa 1,100 ka mga pasyente matag buwan kinsa molupyo sa dakbayan sa Sugbo ang modangop sa buhatan ni Corpin para magpabakuna.
Iyang gipasabot nga ang usa ka pasyente, kinahanglan kining mabakunahan kaupat ka higayon aron siya maluwas gikan sa sakit nga rabies ug nagkinahanglan og dakong pundo.
Gipasabot sa pangulo sa City Health nga sagad sa ilang supply batok sa rabies hinatag gikan sa Department of Health apan sa pagkakaron, dili pa sila makapangayo gumikan sa kakuwang sa suplay sanglit gisuspenso pa una ang transaksyon gumikan sa giingong kontrobersiya nga gikalambigitan sa supplier.
Gumikan sa pagtugot sa konseho, ang City Health makagamit sa P5 milyones nga kantidad gikan sa City Government aron ipalit sa maong bakuna uban sa pagsubay sa proseso sa pagpalit sama sa public bidding.
Sa samang paagi, ang Department of Veterinary Medicine and Fisheries way hunong sa ilang kampanya aron maangkon sa siyudad ang gitawag og “rabies free community.”
Si Dr. Alice Utlang, pangulo sa DVMF nipahibawo nga niabot na og 68,871 ka mga iro ang ilang nabakunahan gikan sa 69 ka barangay sa dakbayan aron dili na mokatap ang rabies sa higayon nga makapaak ang maong mga mananap.
Sa pagkakaron, ang house to house campaign vaccination sa buahtan ni Utlang nagpadayon ug dili sila mohunong hangtod nga dili mabakunahan ang tanang iro gikan sa 80 ka barangay. PAC