NAMATAY diha-diha ang mag live-in partner human gipamusil sa wa pa mailhing mga tawo sa may Zone Ahos, Barangay Paknaan, dakbayan sa Mandaue kagahapon sa udto.

Ang mga biktima giila nga sila Maribel Tecling ug Jessie Montibon, mga hingkod, parehong lumolupyo sa maong dapit.

Matod ni Chief Inspector Mercy Villaro sa Mandaue City Police (MCPO) nga ang mga biktima nagmotor pa sa dihang nahitabo ang krimen mga alas 12:15 sa udto.

Di drugas ang motibo sa pagpamusil, apan daghang mga anggulo ang gitan-aw karon sa MCPO mahitungod sa kamatayon sa duha.

“Wala pa tay konkretong motibo tungod kay daghan ming mga anggulo nga gitan-aw,” ni Villaro sa dihang nahinabi sa Superbalita Cebu.

Matod niya nga sa ilang pakisusi, si Montibon bise-presidente sa homeowners association sa 6.5 hectare relocation site sa Barangay. Paknaan.

“Posible nga aduna ni siya nakabangi tungod kay tanang mamuyo sa relocation site, moagi man niya,” ni Villaro.

Ikaduhang anggulo nga gitan-aw sa MCPO mao ang posibilidad sa love triangle sanglit ang duha pareho mang minyo.

Dugang pa ni Villaro nga duol ra ang mga balay sa biktima ug ang balay sa kanhi bana ni Tecling.

Apan sumala pa sa anak ni Tecling nga si Marijoy Tejaras nga tulo ka tuig nang nagpuyo si Montibon ug iyang inahan.

Tulo ka tuig na sab nga buwag ang iyang inahan ug amahan.

Wa sab siyay nadunggan nga adunay nakabangi o nakontra ang iyang inahan.

Si Tecling adunay unom ka mga anak sa unang bana ug duha kang Montibon.

Ikatulong motibo nga gitan-aw sa kapulisan mao nga basin adunay nagdumot ni Montibon, kinsa nasuta nga kanhi ex-convict nga nahuman na og serbisyo sa iyang sentensya sa kasong pagpatay.

Base sa mga nakasaksing mga silingan nga duha ka mga tawo ang responsable sa pagpusil-patay sa duha, apan hagit karon sa kapulisan sa dakbayan ang pag-ila sa mga suspek sanglit mingaw ang dapit diin sila gipamusil ug way mga closed-circuit television (CCTV).

Paambit pa ni Villaro nga ang mga biktima posibleng giatngan nang daan sa mga suspek.

Gitino pa sad karon sa MCPO kon si kinsa sa duha ka mga biktima ang gi-target sa pagpamanhig.

Si Tecling ug Montibon mao na ang ikaupat ug ikalimang mga biktima sa pagpamusil sa Mandaue ning buwana.

Sa milabayng semana, duha ka mga kanhi ex-convict ang gipusil-patay sa may Cebu International Convention Center (CICC) human sila namilar sa usa ka lalake nga gipusil-patay sab gawas.