GIPANGANDAMAN ug subsob karon ang ensayo sa Team Cebu City alang sa nagsingabot nga Batang Pinoy Games alang sa mga bata nga nag-edad sa 15 anyos paubos nga ipahigayon karong Septiyembre 15-21 2018 sa Baguio City, ang summer capital of the Philippines.
Kini ang giluwatang pamahayag ni Cebu City Deputy Mayor for Sports Eugenio “Jun Gabs” Gabuya Jr.
“Nindot kaayo ang gipakita sa atong mga kabataang atleta sa Palarong Pambansa 2018 didto sa Vigan, Ilocos Sur, kay nikabkab ug nagkadaiyang mga medalya,” batbat ni Gabuya.
Kahinumdoman nga ang Central Visayas Regional Athletic Association (CVIRAA) diin nahisakop ang Team Cebu City naka pwesto sa ikaupat sa overall standings sa Palaro. Ang National Capital Region (NCR) mao na na usab ang kampiyon sa ika-14 nga sunodsunod nga higayon nga gisundan sa Calabarzon ug Western Visayas Region.
“Gihan-ay na sa dakbayan sa Sugbo ang budget alang sa mga atleta ug coaches nga allowance ug incentives, pasalamat kaayo mi sa mga hago ug sakripisyo sa mga coaches/trainers kay sila ang naghatag sa motivations sa mga bata aron makahatag ug dungog sa atong dakbayan,” dugang ni Gabuya.
Si Gabuya nibutyag nga gawas sa grassroots training sa kabarangayan sa basketball ug boxing, ila usab nga gipahugtan ang pagbansay-bansay sa kabataan sa ubang duwa sama sa tennis, dancesport, volleyball ug ang bag-ong gitudlo nila ang arnis ug uban pang matang sa mga paugnat sa kusog. Daniel Quindao Guden - US Correspondent