USA ka 14 anyos nga dalagita giingong gilugos sa byudo nga 51-anyos atbang sa simbahan sa Santo Rosario parish nga gisaksihan sa iyang manghod ug lain pang mga bata.

Hinuon ang suspek nanghimakak sa pasangil kay matod niya rugby boys ang nihilabot sa dalagita.

Click here for stories and updates on the Sinulog 2010 Festival.

Ang giingong pagpanglugos nahitabo sa ngiob nga dapit sa basbetball court sa Brgy. San Antonio, atbang sa Sto. Rosario parish church, siyudad sa Sugbo.

Nasikop sa niresponding kapulisan ang suspek nga si Resederio Miranda, taga Tres de Abril, ning siyudad, mamaligyaay usab sa aseras.

Si “Nene,” taga Pitogo Consolacion, nisumbong sa kapulisan sa Presento Uno nga samtang namaligya siya og newspaper, giduol siya sa suspek.

Gihaylo siya og P200 aron ipalit og pagkaon sa 7 anyos niyang manghod nga iyang kauban.

Ang managsuon anha magkatulganan sa aseras ug namaligya og newspaper human sila gibiyaan sa ilang mga ginikanan.

Tungod sa kawad-on, gisanong sa dalagita ang tanyag sa suspek.

Apan inay motuman sa ilang sabot, wa hatagi ang biktima sa P200 nga gisaad.

Pinaagi sa payphone nga naa daplin sa dalan, nitawag si Nene sa 166 ug nangayo siya og tabang hangtod nasikop ang suspek.

Gitug-an sa bata nga gidala siya sa gamay nga barongbarong sa suspek sa basketball court ug gipahimudsan.

Laing mga bata niuban sa biktima sa police station ug niangkon nga sila nakakita sa maong hitabo kay ilang gilili ang barong-barong diin gihilabtan ang biktima.

Ang suspek sa iyang bahin nanghimakak sa pasangil nga iyang gihilabtan ang bata.

Matod niya nga ang dalagita maoy nitanyag kaniya og sex samtang siya didto sud sa barongbarong sa iyang higala.

Iya kining gibalibaran, apan ang mga rugby boy sa dapit maoy nihilabot sa biktima.

Si SPO1 Alexander Rustila sa Parian police station niingon nga ang dalagita di moreklamo batok kang Miranda kon ihatag kaniya ang P200.

Apan di sila makatugot sa tinguha sa bata kay alarmado ang hitabo. Kagahapon ilang giindusar ang bata sa pink room sa Vicente Sotto Medical Center (VSMMC).