SUPERBALITA CAGAYAN DE ORO

Todino: Pro Bono

Kon tuohan nato dayon ang pamahayag ni Gobernador Yevgeny Emano nga ihiklin niya ang politika sa pagpatuman sa programa nga “Bililhon Ang Matag Baryohanon Ipalambo” kon Barangay Bambi, sa lalawigan sa Misamis Oriental, nan, makapaabot ta og kalamboan sa matag barangay.

Basi sa maong programa gahinan sa Kapitolyo og P300,000 ang matag barangay aron makapatuman kini sa ilang mga proyekto. Dili ang Kapitolyo ang mo-implemntar sa program apan mismo ang mga kapitan.

Dunay 424 ka mga barangay sa lalawigan ug dili tanang mga kapitan dumadapig ni Emano.

Apan, gipaniguro sa gobernador nga i-apod-apod niya ang pundo sa walay pagtan-aw sa baruganan sa barangay kapitan – nagpasabot patas iyang pagtagad sa tanang pangulo sa barangay aron mapadangat gyud ang batakang serbisyo ngadto sa katawhan.

Tan-awon nato kon wala bay gipahambin nga kondisiyon unya niining hinabang nga P300,000.

Ang mga taga probinsiya, labi na ang mga pangulo sa mga barangay, munisipyo ug siyudad ang labing nasayod kon matinud-anon ba ang gobernador sa iyang gisaad.

Mas maayo nga giluwatan kining pamahayag ni Emano nga dili siya magpinig og politika sa paghatod og serbisyo ngadto sa barangay aron singlon unya nato kon misukwahi ba siya sa iyang pasalig.

Pagkakaron, wad-on una nato ang pagduda nga dunay laing motibo ang gobernador sa pagduso sa iyang Barangay Bambi nga program. Hatagan nato siya og higayon nga mopakita sa iyang “kamatinud-anon” isip amahan sa probinsya.

Apan, kinahanglan usab magmatngon kining mga barangay kapitan nga wala makalinya ni Emano aron dili sila mahulog sa lit-ag kon ugaling dunay tinonto niining programa ug sakyan sa pamolitika.

Walay kwesiyon kon mohatag og hinabang ang Kapitolyo ngadto sa mga barangay. Kay buot hunahunaon, katungdanan ug responsibilidad na sa namunoan sa lalawigan ang pag-atiman sa iyang hurisdiksiyon ug apil na niini ang kabarangayan.

Apan, kon duna nay mga kondisiyon unya nga ipahimo aron makapahimus sa hinabang, nan, kana angay na pud badlongon nato. Kay kon moalagad gani dili ta magbutang og mga kondisiyon nga mopabor sa atong politikanhong interest.

Unta, motakod kining pamaagi sa gobernador ngadto sa mga provincial board members aron patas usab ilang paghatod og serbisyo ngadto sa ilang mga constituents ug dili lang sa ilang mga dumadapig.

Pagkakaron, paminawon, panid-an ug obserbahan nato kon nasubay ba sa iyang pasalig ang pagpresentar sa Barangay Bambi sa probinsiya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph