NAGSIGE na karon og follow-up ang mga tanod sa kabarangayan sa siyudad sa Sugbo sa umento sa honorarium kay upat ka buwan na human kini gisaad ni Mayor Tomas Osmena, wa pa gyud kini nila madawat.

Ang mayor nipasalig niadtong Oktubre nga makadawat og dugang P2,000 nga umento sa honorarium ang mga tanod dugang sa ilang naandan nga P1,500. Kini nagpasabot nga ang honorarium matag buwan sa mga tanod moabot na sa P3,500.Apan hangtod karon, matod sa mga tanod nga wa pa gyud silay nadawat ug ang labing dakong pangutana kon kanus-a gyud kini mahatag.

Click here for stories and updates on the Sinulog 2010 Festival.

Gitug-an ni Jojo Basco, usa sa mga tanod sa Poblacion, Pardo nga nag-iyahay nalang sila’g pangutan-anay sa mga tanod sa kasilinganang barangay kon duna na bay hearing kanus-a ma-release ang dugang allowance.“Sus bisag asa nalang mi nanghuwam ani kay wa pa man gyuy klaro kanus-a. Nalipay mi nga naa na kay dako gyud nag ikatabang namo pero mao lagi wa pa may klaro.” maod ni Basco sa Sun.Star Superbalita.

Si Guadalupe barangay kapitan Eugenio “Jingjing” Faelnar, pangulo sa Association of Barangay Councils (ABC), nipasabot nga ang kalangay sa ubang mga barangay sa pagduso sa listahan sa ilang mga tanod maoy hinungdan nganong wa pa kini ma-release.Kini tungod kay ang budget alang sa dugang honorarium alang lang sa tag 20 ka tanod sa matag barangay apan dunay mga barangay nga niabot og 40 ,sama sa Guadalupe.CPL

Sanglit daghan nang mga barangay ang nagsige og follow-up, matod ni Faelnar nga iya nalang giduso ang listahan sa Accounting office bisan kon di pa tanang barangay ang naka-submit sa ilang listahan.

Di hinuon matino ni Faelnar kon kanus-a gyud kini ma-release sanglit mag-agad na lang sila sa Accounting.

“Naa pay wa maka-submit pero di ra sila angay mabalaka kay makadawat ra gihapon sila, late lang,” nagkanayon si Faelnar.

Gipasabot usab niini nga ang madawat lang una sa mga tanod mao lang ang alang sa tulo ka buwan gikan Oktubre hangtod Disyembre sanglit wa pa man maapil sa budget sa City Hall ang dugang allowance sa mga tanod alang ning tuiga.

“Ako ning follow-upon ugma (karong adlawa) sa Accounting,” pasalig pa ni Faelnar.(CPL)