PULIS nakuyapan human gitabangan pagsukmag sa iyang duha ka mga dinakpan sulod sa police station sa Tabuelan hinungdan nga daling gidala sa tambalanan.

Nahitabo kini niadtong Martes pasado ala 1 sa kaadlawon sulod sa Tabuelan Police Station samtang gihusay sila ni SPO1 Amelito Alcala, taga lungsod sa San Remegio, Sugbo apan nadistino sa Tabuelan Police Station.

Click here for stories and updates on the Sinulog 2010 Festival.

Si Alcala niresponde sa alarma sa kagubot sulod sa usa ka videoke bar sa sityo Quasi, barangay Poblacion, human nga ang gikatahapan wa magkasinabot sa tindera tungod sa bayrunon.

Si Alcala nidala sa mga gikatahapan nga sila si Ernesto Dura, Chavie Guit-guit, Jennifer Curataton,ug Efefanio Bejano, pulos nagpuyo sa maong lungsod.

Sulod sa police station nahitabo ang ilang mainit nga panaglalis tali sa pulis ug sa mga suspek.

Kalit nga gisukmag ni Dura si Alcala ug niapil pa usab sa pagsukmag si Curataton.Nalamba ang pulis ug nawagtangan sa panimuot.

Daling gidala si Alcala sa Tuburan Police Station, apan gibalhin sa tambalanan sa dakbayan sa Sugbo.

Si Cebu Provincial Police Director Senior Supt. Erson Digal niingon nga kasong frustrated homicide ug direct assault ang ilang gipasaka batok sa duha.

Gani ang duha pulos na gitanggong sa Tabuelan Police Station human daling gidakop. (DRT)