SIYAM ka mga tawo, walo niini mga sakop sa Philippine Air Force (PAF) ang nangamatay sa pagkahagsa sa usa ka Nomad plane sa subdivision sa Cotabato city kagahapon sa buntag.

Lakip sa namatay mao ang usa ka babaye sa balay nga nahagsaan ug nasunog samtang naangol sab ang iyang kauban.

Click here for stories and updates on the Sinulog 2010 Festival.

Usa sa namatay mao si Maj. Gen. Mario “Butch” Lacson, kumander sa 3rd Air Division sa PAF nga nagbase sa Zamboanga city.

Laing personnel nga nangamatay mao sila si Maj. Prisco Tacoboy, staff officer ni Lacson; Aide-de-camp 2nd Lt. Alexander Ian Lipae; Sgt. Christie “Jingle” Llamera; Sgt. an Mejia; Pilot Captain Gaylord Ordonio;Co-pilot 1st Lt. Angelica Valdez; ug Crew chief Staff Sgt. Jeffrey Gozon.

Si Llamera naa nagpuyo sa Maria Luisa subdivision, brgy. Banilad, siyudad sa Sugbo.

Si Cotabato City Mayor Muslimin Sema niingon nga usa ka sibilyan nga giilang si Inday Mondrano, namatay sab samtang diha sud sa balay sa iyang higala.

Naangol nga lumolupyo mao si Jela Gumiton.

Si Brig. Gen. Carlix Donila, wing commander sa 530th Air Base Wing, niingon nga ang piloto sa Nomad plane naka-contact sa tower pipila ka mga minuto human mahagsa ang abyon.

Matod sa piloto nga ang abyon nakasinati og power loss.

“Reports indicate that the pilot contacted the tower and called that they were experiencing power loss…If we review what [was initially reported], the first thing that will come to our mind is mechanical failure,” matod ni Donila.

Ang abyon nilupad mga alas 11:35 sa buntag ug mga alas 11:37 sa buntag, ang piloto nitawag sa radyo sa tower nga mobalik sila sa station.

Mao kadto ang katapusang komunikasyon sa piloto.

Samtang ang kadagkuan sa 220th Airlift Wing sa Mactan Benito Ebuen Air Base sa dakbayan sa Lapu-Lapu diin nagbase ang Nomad plane, nibutyag nga dos minutos gikan sa pag take off sa abyon sa runway sa Cotabato nawala ang linya sa komunikasyon niini.

Karong adlawa adunay himuong commemorative mass sa Mactan Air Base Chapel pahinungod sa nangamatay nga sundawo.

Samtang nasayran nga si Llamera bag-uhay lang ni-take sa bar examination niadtong miaging tuig human nigraduwar sa kursong abogasiya sa University of Southern Philippines Foundation sa susamang tuig.

Apan si 1LT. Ronel Sala sa 220th Airlift Wing nipasabot nga wa pa silay opisyal nga listahan nga ipagawas sa mga ngalan sa sakay sa abyon sa higayon nga di pa nila mapahibawo ang mga kabanay niini.

Gikompirmar ni Sala nga adunay walo ka mga sundawo ang sakay sa maong abyon. Atol sa pagkutlo niining balita aduna nay investigating body nga gipadala sa maong dapit, ingon man ang pagpadala sa C130 Hercules plane gikan sa MBEAB.