DAGHAN ang gipangkuyawan niining bag-ong mi-asumer nga hepe sa Criminal Intelligence and Investigation Group ( CIDG 7 ) kay nahaom sa kaso sa patay karong panahuna. Kay ang molingkod mao si Supt. Lito Patay . Daghan gyud makuyawan niini nga modaghan ang patay dinhi sa Cebu.
Hinuon, bisag dili pa si Patay ang hepe, di kini mawa ang pinatyanay samtang anaa pa si Presidente Rodrigo Duterte sa gahom kay bokal siya sa kampanya batok sa drugas.
Modaog ang PNP batok Tomas
Para nako, dili na makapanalipod sa iyang kaugalingon kay patay naman si PO3 Eugene Calumba, sa isyu sa mga pasangil nga maoy responsable sa mga high profile kiling.
Hinuon, gipanalipdan si Calumba nila ni Cebu City Police Office Chief Supt. Royina Garma ug Police Regional Office Director Chief Supt. Debold Sinas. Samtang ang mga suspek nga sila si Tejero barangay Konsehal Jessielou Cadungog ug iyang driver nga si William Macaslang gipanalipdan ni Cebu City Mayor Tomas Osmeña
Para nila ni Sinas ug Garma, ang ilang pulis maoy gi-ambush. Gani daghan kining nadawat nga pasidungog kay usa man kini ka police awardee sa pipila ka mga higayon.
Sa akong tan-aw, ang modaog sa away sila si Sinas ug Garma kay sila gitudlo ug gisaligan ni Duterte.
Sa away sa duha ka mga grupo, sayon ra sabton. Modaog niini ang PNP batok ni Osmeña tungod sa suporta ni Duterte.
Way hambog si Davide
Mao sab ni akong naobserbahan ni Gobernador Hilario Davide III, sa iyang mga maayong nahimo sa pagduma sa Kalitolyo sa Sugbo, wa niya ipanghambog. Gipahibawo man sab sa gobernador ngadto sa katawhan ang mga kalampusan sa iyang administrasyon. Pulitika man gud ni. Ang nakanindot ni Davide kay dili traditional politician. Kanang ilang gitawag og trapo . Di sab balimbing bisan pa man sa mga tanyag sa PDP Laban.
Ang Pinamungahan karon
Nausab na gyud ang dagway sa lungsod sa Pinamungahan tungod sa mga kausaban nga gipatuman ni Mayor Glenn Baricuatro. Ang kasayuran nga akong nadawat napatuman ang kalimpyo sa plaza. Migradwar na ang 1st batch sa bachelors degree sa Cebu Technological University (CTU Pinamungahan) gikan sa pamilyang kabus.
Karong tuiga, mahurot na pagbutang og covered court sa tanang mga barangay.
Email: efrenlonzon77@gmail.com Text: 09235562777