NAHATIUROK pagsamot sa kabalaka ang mga kritiko sa administrasyon. Ilang pagtuo gisugdan na ang paghatag og katungod ang China nga mao nay manag-iya sa Panatag Shoal ug Spratley islands.
Apan ang kaatbang nga mga pulitiko naghikabkab na sa pagpadako ning maong isyu nga panagsawo (60-40%) pabor sa Pilipinas. Wan-a, matod nila, gihatag nang bahawan sa atong Philippine Sea territory sa mga Insek.
Mahimong balido ang ilang hunahuna ug pangagpas. Apan angay nilang mahibaw-an nga negusyo kini nga kasabutan. Way soberanya nga gitunol ngadto sa mga Insek.
Husto si Acting Chief Justice Antonio Carpio nga ang soberanyang mga katungod wa lang matandog nga okey ang nag-ung-ong nga kasabutan. Nakita nga ang porsinto nga binahinay pinasikad sa 1987 Constitution.
Mga kasabutan ingon niini nagkinahanglan sa pagtangdo sa Senado suma sa atong Batakang Balaod. Busa lalisunon pa ni sa mga senador. Apan mayoriya ang pro-administrasyon, way mahimo ang mga kritiko.
Hinuon, ang nakaayo dinhi nga nasihag na ang tuyo sa China sa ilang pangangkon sa mga dapit sa West Phil. Sea ubos sa ilang 9-Dash line claim theory nga ilang gitindugan.
Gisalindot nila ang hukom sa Prague International Court nga nibasura sa 9-Dash line nila pabor nato ug gipahugtan ang ilang militarization effort.
Suma pa, binilyon ka mga barrel sa gas ug lana nga anaa sa West Philippine Sea. Kini ang tuyo sa China.
Gibana-bana nga 5 trillion dollar trade kun negusyo ang mag-agian sa South China Sea.Ingon ini ang bili nganong nangangkon ang China ning mga dapita.
Kon mahilabtan ang libreng paglatas (free navigation) molihok na ang mga superpower sa kasadpan sama sa United States, Russia, England, France.
Mora unya nig bulkan nga bumobuto ngadto sa ikatulong Gubat sa Kalibutan.
Husto ning kasabutan sa panagsawo kay malinawon nga paagi sa pagpatunhay sa mga relasyon sa kanasuran sa Asya. Bilateral negotiation maoy bililhon sa tanan. Ayaw tanduga lang ang atong soberanya.