GIIMBESTIGAHAN sa Traffic Group sa Davao City Police Office (DCPO) kung duna ba'y tulubagon ang drayber sa pasaheroang multicab human kalit kining misarasay alas 11 sa gabii niadtong Dominggo, Agosto 5, atubangan sa Verdon Parc Condo, Ecoland Drive, Davao City.
Base sa journal sa Operation Branch sa DCPO, ang drayber sa multicab mao si Castor Viovicente Sarco, 36, ug residente sa Talisay, Times Beach, Brgy. 76-A Bucana.
Giingon nga dunay mga pasahero ang multicab gikan sa Opal Street, padung sa Maya Street, ug aron pa-downtown, apan pag-abot niini atubangan sa Verdon Parc Condo, kalit kining misarasay hinungdan nga nangalagpot ang ubang pasahero nga gikasamad sa dose ka mga sakay niini.
Ang mga nasamdan mao sila Lovie Arcie Pacudon, 22; Sarah Jane Mangasar, 24; Maruel Gadiz, 20; Rhona Ibañez, 18; Shyralph Anthony Abendaño, 31; Alvin Alisoso, 21; Cherrymae Magandang, 24; Roger Silagan, 38; Shovey Jane Angos, 25; Angelito Lucaban, 24; Rosalie Langusad, 38; ug Salvador Langusab, 40.
Ang mga nasamdan gipangtabang dayon sa 911 paramedics ambulance samtang ang drayber temporaryong gikustodiya sa kapulisan. (Jeepy P. Compio)