KULANG ang suweldo sa mga magtutudlo ug alang nila di kini bastante bugti sa ilang “meaningful way of teaching” ngadto sa ilang mga estudyante.
Atol sa regular session Martes sa buntag, Agosto 7, sa 17th Council sa Davao City, mibutho ang Alliance of Concerned Teachers (ACT) Davao City Chapter diin ilang gipagawas ang ilang mga mulo sa hawanan sa konseho.
Una niini, atol sa privilege speech ni Education Committee Chairperson First District Davao City Councilor Pilar Braga nga nagpadala og suwat kaniya ang ACT diin nagpaabot sa ilang lisod nga kahimtang.
Unod sa suwat ang paghangyo sa mga magtutudlo nga magbuhat og ordinansa ang dakbayan sa Davao bahin sa dugang P2,000 local monthly allowance ug P2,500 quarterly rice subsidy sa tanang personahe sa Department of Education (DepEd) nga maggikan sa pondo sa lokal nga kagamhanan.
Gilayong nagpasabot si Danny Dayanghirang, Finance Committee Chair Second District councilor, nga magdepende gihapon kang Davao City Mayor Sara Duterte ang desisyon sa pag-alokar og dugang subsidiya ngadto sa mga magtutudlo.
Sumala ni Dayanghirang nga magkinahanglan og P240 milyon nga budget matag tuig ang lokal nga kagamhanan alang sa gipangayo nga dugang suholan sa mga magtutudlo diin wala pa'y labot niini ang ilang gipangayo nga rice subsidy.
Giingon sab ni Dayanghirang nga mas gihatagan karon og prayoridad ang pagpalig-on sa pundo sa Lingap Para sa Mahirap, sa mga police auxiliares ug sa mga street lighting facilities.
Apan alang ni ACT-Davao City Chapter President Reynaldo Pardillo, nga dako kaayong tabang sa ilang trabaho kung madungog ni Mayor Sara ang ilang gihangyo gumikan kulang ang P17,000 nga take home pay sa suweldo nga P19,000 matag bulan.
Si Pardillo nagbutyag nga dako ilang paglaum nga madungog kini sa Mayor, apan suma ni Braga di siya maghatag og pagpasalig sa mga magtutudlo nga matuman kini, inay mohimo siya og mga pamaagi ug plano nga matuman ang gihangyo sa mga magtutudlo sa Davao City.