NANGUSOG si Senador Manny Pacquiao nga mapasar sa Senado karong tuiga ang balaudnon nga magbanhaw sa silot sa kamatayon. Kini bisan pa sa bag-ong giluwatan nga pagtulon-an ni Pope Francis nga ang death penalty “inadmissible” kay usa kini ka pag-atake sa dignidad sa usa ka tawo.
Ang karaang pagtulun-an sa Simbahang Katoliko nag-ingon nga mahimong ipahamtang ang silot sa kamatayon “if this is the only possible way of effectively defending human lives against the unjust aggressor.” Ang bag-ong pagtulun-an, ubos sa Catechism No. 2267, nag-ingon nga duna pay laing mga paagi sa pagpanalipod sa kaayohan sa kadaghanan ug ang Simbahan maningkamot sa pagwagtang sa silot sa kamatayon.
Ang death penalty gi-abolish sa kadaghanan sa mga nasud sa Uropa ug South America, apan gipahamtang pa sa Estados Unidos ug sa ubang mga nasod sa Asya, Africa ug Middle East. Si Presidente Tayyip Erdogan sa Turkey niingon nga ilang banhawon ang death penalty nga ilang gi-abolish niadtong 2004.
Matod pa ni Pacquiao ang silot sa kamatayon anaa sa Bibliya ingon man sa atong Batakang Balaod alang niadtong nakahimo og mga heinous crimes kon mga linuog nga krimen sama sa drug trafficking, rape with murder, robbery with murder ug kidnap for ransom.
Apan andam siya nga limitahan ang silot sa kamatayon ngadto lang sa high-level drug trafficking. Kini isip pagsuporta sa programa sa administrasyon sa pagsumpo sa illega nga drugas nga sumala pa sa mga taho nikalas na sa mokabat sa 7,000 ka mga kinabuhi, depende kon si kinsa ang mag-ihap.
Ang House of Representatives, sa boto nga 217-54 ug usa ka abstention, nipasar na sa House Bill 4727 nga magpahamtang pagbalik sa silot sa kamatayon sa mga kaso sa illegal nga drugas. Usa sa nisupak sa maong balaudnon mao si kanhi Presidente ug karon Pampanga Rep. Gloria Macapagal-Arroyo, ang bag-ong House Speaker.
Wa na ilakip sa death penalty bill ang mga kaso sa plunder, rape ug treason. Di na sab mandatory ang silot sa kamatayon. Ang huwes gihatagan og gahom sa pagpatuman sa life sentence inay sa death penalty.
Lakip sa pahamtangan sa silot sa kamatayon ang pag-impot og dangerous drugs, pagbaligya, pag-apod-apod, pag-transport, pagmentinar og usa ka drug den ug pagtanom og ebidensiya sa mga kaso sa illegal nga drugas.
Di ipahamtang ang silot sa kamatayon ngadto sa mga ubos sa 18 anyos ug kapin sa 70 anyos. Ipahamtang kini pinaagi sa pagbitay, firing squad o kaha lethal injection. - edbarrita@gmail.com