Ferry mobiyahe sa Cebu City-Mactan

ADUNA nay alternatibong kasakyan ang publiko ilabi na niadtong molabang paingon sa mainland Cebu nga maggikan sa Lapu-Lapu o vice versa nga di na mag-antos sa kahuot sa trapiko.

Gipahibawo ni Eugene Eric Lim, CEO -president sa Topline Marina nga adunay duha ka passenger ferry ang Island Express nga mobiyahe gikan sa Mactan wharf, Barangay Ibo, Lapu-Lapu City paingon sa Pier 3, Cebu City.

Karong Agusto 28 magsugod ang operasyon niini.

Samtang nipasalig ang CEO - President sa Island Central Mactan, Edwin Lim nga paspas, luwas ug komportable ang mga pasahero sa ila unyang pagbiyahe nga gibana-bana nga sud sa 30 minutos moabot sa ilang destinasyon.

Gipahibawo sab nga tag-P25 ang pletihan (one way) nga mobiyahe gikan sa alas 5 sa buntag hangtod sa alas 9 sa gabii matag adlaw.

Mokarga kini og 325 ka mga pasahero. Matod pa ni Eric nga adunay kinatibuk-ang 16 ka mga biyahe ang matag passenger ferry kada adlaw.

Si Mayor Paz Radaza, sa iyang bahin, nihangop niini sanglit makaabag kini nga kaminusan ang problema sa trapiko ug makapasayon sa mga commuter ilabi na sa habig sa Pusok o Mactan area nga di na mosubay sa duha ka taytayan.

“Salamat sa Lim family of thinking about this, putting up two vessels to ferry (pasahero) to and from Cebu City,” matod ni Radaza.