KONTROBERSYAL nga pulis nga gikan sa giilang deadliest police station sa Quezon City human mapatay ang 106 ka mga drug personalities pormal nang milingkod isip regional chief sa Criminal Investigation and Detection Group 7.
Di patay sa mga kriminal ang tuyong pagbutang kang Sr. Supt. Lito Patay, kon di gukdon kadtong mga most wanted person nga adunay mga pending warrant of arrest aron dakpon ug bilangguon.
Sukwahi kini sa pagduda sa publiko nga gituyo sa pagdestino si Patay sa CIDG 7 aron pamatyon kadtong mga nalambigit sa illegal nga drugas.
Atol sa interview sa mga tigbalita kaniya, siya nagkanayon nga ipatuman lang niya kon unsay naa sa balaod, lakip na ang programa sa Philippine National Police (PNP).
“Wala may dapat planohan ang paglingkod nako as chief sa CIDG kay una, dili gyud na namo trabaho ang pagplano kay naa namay plano daan ang PNP. Ang tasking sa CIDG manakop og wanted, organized crime ug pagpangita sa nag posses sa firearms,” matod ni Patay.
Nahimong kontrobersyal si Patay sa dihang siya ang nangulo sa Batasan police station 6 sa Quezon City Police District niadtong Hunyo 2016 hangtod Agusto 2017 diin 106 ka mga drug personalities ang namatay sa ilang anti-drug operations.
Apan wala na siya motubag sa media labot sa iyang pagdestino sa Quezon City nga nahimo siyang sentro sa mga balita atol sa pag lingkod sa katungdanan ni Presidente Rodrigo Duterte.
Lakip sa iyang tahas mao ang paghatag og pagtagad sa mga high profile nga kaso sa patay sa Central Visayas lakip na ang kaso ni PO3 Eugene Calumba.
Sa dihang gikuhaan sa iyang reaksyon labot sa kaso ni Peter Lim, ang Sugboanong negosyante nga ginganlan ni Presidente Duterte, si Patay nitubag.
“Peter Lim? Dili man ko aware ni Peter Lim. Wala man ko kaila ana kay wala man ko na assigned diri. Unsa diay na siya, Mam?” dungan sa pahiyom ngadto sa media.
Lumad nga taga lungsod sa Talingling probinsya sa Siquijor si Patay apan human mi gradwar sa Philippine National Police Academy Kapanalig class of 1997, diretso na siya nadestino sa Provincial Mobile Group sa Davao del Norte.
Nahimong station commander sa nagkadaiyang police station sa Davao del Norte ug Compostela Valley Province diin niadto lang 2016 gibalhin sa kaulohan.
Nahimong suod ni kanhi PNP Chief Ronald Bato Dela Rosa sanglit susama sila nga maayong mogamit og armas.