NAILA ang Northern Samar tungod sa talagsaong tourist destinations sa dapit.
Usa sa tuyong bisitahon sa mga turista mao ang Biri Island.
Gawas sa tin-aw nga dagat, gipasigarbo sab sa lokal nga kagamhanan sa Biri ang talagsaong rock formations nga nag-atubang sa Pacific Ocean.
Adunay unom ka klase nga rock formations ang makita sa dapit: Magasang, Masapad, Macadlaw, Puhunan, Bel-at, ug Caranas.
Sigun sa tourism office sa Biri, modagsa ang mga turista sa isla matag Semana Santa, summer ug “Ber” months.
Sa pag-adto sa Biri Island gikan sa Sugbo, sakay og ayroplano padung sa Calbayog City ug Catarman City. Pwede pud magbarko padung sa Calbayog nga moabot og 12 ka oras.
Importante nga i-check daan ang schedule sa ayroplano ug barko sanglit di man kada adlaw ang biyahe niini.
Gikan sa pantalan sa Calbayog, sakay og jeep padung sa Allen.
Gikan sa Allen, sakay nasab og tricycle o jeep padung sa fish port sa Lavezares. Gikan sa Lavezares, sakay og bangka padung sa Biri Island.
Moabot og usa ka oras ang biyahe sa bangka padung sa Biri.
Dagko nga balud ang mosugat nimo ilabina kon habagat ug amihan.
Gikan sa town center, mosakay pa og habal-habal padung sa rock formations apan gikinahanglan una magpa-register sa ilang tourism office alang sa tour sanglit gidili man ang pagsuroy sa rock formations nga way pahibawo sa buhatan ug way tour guide.
Mokantidad og P350 ang regular rate sa tour samtang P800 kon adunay activities sama sa sunrise ug sunset.
Gawas sa sight seeing, ayaw pakyasa ang pagkaligo sa natural pool sa Bel-at Rock Formation.
Sa mga mag-overnight, adunay affordable nga pension house ug resort sa isla.
Adunay mga barato nga kan-anan sa isla. Sa mga nangita og seafood, mamahimong mokaon sa Lawud restaurant nga anaa duol sa Bel-at. Anaa sa P190 pataas ang presyo sa ilang menu.
Importante sab nga magbutang og sunblock ug magsuot og light colored unya hayahay nga senina kon mobisita sa dapit.
Giawhag sa lokal nga kagamhanan sa Biri ang mga turista nga di magbilin og basura o hugawhugawan ang rock formations aron mapreserbar ang kaanindot sa kinaiyahan.
Sa panultihon pa sa 19th century American Indian chief, Chief Seattle, “Take nothing but memories. Leave nothing but footprints.”