GIBAHARAN ang mga magduduwa ug mga tim nga miduwa sa 33rd Kadayawan sa Dabaw Invitational Basketball Tournament nga kung kinsa ang mohimo og kagubot o manumbag diretso dayong sikupon.
Kini ang mando ni SBP 11 Referee commissioner Atty. Francis Calatrava atol sa gihimong coaches meeting niadtong Miyerkules sa gabii, Agusto 8, ug gikompirma ni University of Cebu (UC) Coach Danica Canitoy atol sa Davao Sportswriter Association (DSA) Forum didto sa ground floor, SM City Davao Annex kagahapong adlawa.
Ang mga tim nga magkontra sa free-admission tournament mao ang defending champion University of Sto. Tomas (UST) Growling Tigers, National University (NU) Bulldogs, University of Cebu (UC) Webmasters ug ang pambato sa Davao nga Go-Duterte Eagles.
"If it will result to violence, magsuntok tantamount to a crime. We don't want what happened last time. Let the referrees do their job to control the players, iba yung nagsuntok depende sa sitwasyon beyond normal," ni Calatrava atol sa pakighinabi kaniya sa telepono kagahapon.
Bahin ni Danica, "We're aware of that. Sulti ni Atty. Calatrava arrested agad if may mag-punch na isang player. Alam naman nila kung ano ang tama o mali, laro na lang kami ng basketball."
Kahinumdoman, nagbinukbokay ang De La Salle University (DLSU) Green Archers ug Far Eastern Philippines (FEU) Tamaraws sa parehong kompetisyon niadtong milabay nga tuig.
Ang duwa gisugdan kagahapon didto sa Davao City Recreation Center kanhi Almendras Gym diin ang mokampeyon mouli og P100,000 samtang ang mosunod nga tulo ka puwesto makakuha og P60,000, P50,000 ug P30,000, sa maong han-ay.
Ang most valuable players (MVP) ug best coach makadawat og P5,000 matag usa.
Ang torneyo gipresenta sa Samahang Basketbol ng Pilipinas Davao, kauban ang Sports Development Division-City Mayors Office nga makita hangtud Dominggo, Agosto 12. (Marizz R. Perez)