SECTIONS
Saturday August 18, 2018
SUPERBALITA DAVAO

7-bulang buntis gipusil sa bana

COTABATO CITY - Grabe ang kahimtang sa pito ka bulan nga buntis nga gipusil sa iyang bana alas 3:45 sa hapon niadtong Miyerkules, Agusto 8, sa siyudad.

Giila ang biktima nga mao si Raisa Dalimbang Calis, 37, minyo ug nagpuyo sa Barangay Poblacion 2, Lebak, Sultan Kudarat.

Gibutyag ni Cotabato City Police Office director, Senior Superintendent Rolly Octavio nga pagawas na unta ang biktima sa Novo Store sa dakbayan, uban ang iyang igsuon.

Apan kalit lang giduol sa bana nga si Rajib Calis ug gipusil ang biktima gamit ang kalibre .45 nga pistola.

Daling miikyas ang suspek dala ang kuwarta sa biktima nga P13 mil nga gikan sa 4Ps nga bag-o lang nag-withdraw sa bangko.

Daling gisapupo sa igsuon ang biktima ug gihatud ngadto sa Cotabato Puericulture Hospital apan gibalhin dayon ngadto sa Cotabato Regional and Medical Center (CRMC) ug anaa sa grabe nga kahimtang.

Nasayran nga naigo si Raisa sa kilid sa lawas nga milapos sa likod. Apan maayo na lang kay wala maigo ang bata nga gimabdos niini.

Nasayran usab nga sa wala pa ang hitabo, nagkalalis ang magtiayon gumikan sa personal nga problema sa ilang pamilya.

Sa pagsuwat ning balita, padayon nga gipangita ang suspek sa kapulisan ug gitakda nga pasakaan og tukmang kaso. (Edgar E. Fuerzas)


VIEW COMMENTS