SECTIONS
Wednesday August 15, 2018
SUPERBALITA DAVAO

60 bay nasunog sa electric fan

DAVAO. Mga molupyo nagkabya og tubig gikan sa dagat ngadto sa nasunog nga balay sa Purok 2, Barangay 76A Mabini, Boulevard, Davao City sa dapit nga wala makaabot ang mga bombero. (Hulagway ni Macky Lim)

WALAY nasalbar bisan usa ka butang si Benita Bingot, 46, usa sa mga nawad-an og panimalay human sa dakong sunog sa baybayong bahin sa Purok 2, Barangay 76-A, Mabini, Davao City sa Huwebes, Agusto 9.

Gisaysay niya nga namahulay ug nangatulog sila sa dihang nakatimaho og aso gikan sa balay haduol kanila. Nakadungog sila og mga tawo gikan sa mga silingan nga nanayagit og "sunog!"

Tungod sa kataranta, iyang gitapok ang iyang mga anak ug mga apo nga mga gagmay pa aron nga segurohon ug wala na magtagad sa ilang balay. Human makabakwit sa lugar, ang kalayo dali rang milamoy sa ilang balay nga gama lang og mga kahoy.

Ang ilang balay nahurot gyud og kasunog ug ang makita na lang mga itom nga aso gikan sa ilang balay.

Matud niya nga Bingot nga nagpuyo siya sa maong lugar mga duha na ka dekada.

Duna siyay lima ka mga anak ug lima ka apo. Temporaryo silang nagpuyo sa kapilya duol sa ila ug nagplano nga motukod og payag kon asa gitukod ang ilang balay aron nga ilang kapuy-an human ang paglimpyo sa lugar.

Ang City Social Welfare and Development Council (CSSDO) naghatag og hinabang ngadto sa mga biktima ug sukad alas 3 sa hapon kagahapon, nagpadayon pa ang pagpanglista sa mga naapektuhan sa sunog. Ang mga biktima makadawat og tabang pinansiyal.

Mga tag-iya og mga balay nga "totally damaged" makakuha og P10,000 samtang P5,000 ihatag ngadto sa mga tag-iya sa mga balay nga "partially damaged".

Mga nangabang makadawat sab og P5,000 samtang ang nangipon ug boarders makadawat sab og P2,000.

Sa paghinabi kang Senior Fire Officer (SFO2) Felix Amistad, officer-in-charge sa SIR Fire station, siya nagknayon nga ang posibleng hinungdan sa insidente mao ang pag-overheat sa aplayanses nga mao ang electric fan base sa pamahayag kon asa nagsugod ang sunog.

Sukad 3 sa hapon sa Huwebes, mga bombero naghimo pa og operasyon aron nga masegurong wala nay kalayo. Ang hagit alang sa ilang bahin mao ang lokasyon sa naapektuhan nga lugar nga duol sa dagat ug ang agianan pasulod niini kay lisud hinungdan nga mga fire trucks wala makasulod, nagkonekta lang sila og daghang mga balay hangtud nga nakaabot sa "ground zero".

Gibutyag ni Amistad nga duna lay usa naangol. Ang biktima nailhan isip Darwin Namoc kinsa nakaangkon og 1st degree burn samtang misulay sa pagbakwit. Gawas kaniya, ang tanan luwas.

Base sa opisyal nga taho gikan kang Bureau of Fire Protection (BFP 11) officer-in-charge of the Intelligence and Investigation Section Officer 2 (SFO2) Ramil Gillado, ang sunog miulbo mga alas 12:10 sa hapon ug dunay mga 60 ka mga balay ang naapektuhan.

Ang sinugdanan sa sunog giingong gikan sa balay sa usa ka Lovely Toto. Ang mga imbestigador sa sunog nagbanabana og kapin kun kulng P630,000 nga danyos. Ang sunog nakontrolar mga alas 1:27 sa hapon.

Tungod sa gidak-on sa sunog, ang alarm status miabot ngadto sa 3rd alarm. Daghang mga fire units miresponde naglakip sa S.I.R., Bangoy, Central, Lanang, 911 fire auxiliary, Davao Volunteer Fire Brigade, Filipino Chinese Firefighters Foundation ug Barangay 19. (JCR)


VIEW COMMENTS