SECTIONS
Wednesday August 15, 2018
SUPERBALITA CAGAYAN DE ORO

Laing misukol sa drug bust, patay

PATAY ang usa ka lalaki human giingong misukol sa drug bust niadtong Huwebes sa gabii sa Barangay Kalangahan, Lugait, Misamis Oriental.

Giila ang napatay nga si Elvin Amarga Jr., residente sa Brgy. Maputi, lungsod sa Naawan.

Gibutyag ni Police Senior Superintendent Rolando Destura, Misamis Oriental provincial police director, nga kini hiniusang operasyon sa kapolisan sa Lugait Municipal Police Station, Provincial Drug Enforcement Unit (PDEU) ug Philippine Drug Enforcement Agency (PDEA).

Dugang ni Destura nga ang dinakpan lumad nga taga Naawan ug nalakip sa drug watch list ug tungod kay init kini sa kapolisan, mibalhin kini sa lungsod Lugait.

"Nagtuo siguro ni siya nga dili siya gamonitoron bisan nibalhin og lungsod," matud ni Destura.

Atol sa operasyon ug sa pinalitay, nakabantay kining suspek nga polis ang iyang ka transaksakyon.

Giingong gipabuto ni Amarga ang iyang kalibre 35 nga armas apan wala kini kabuto hinungdan nga nabaslan sa mga polis ug napusilan ang dughan niini diin gideklarar kini nga dead on arrival sa dihang gidala sa Naawan Provincial Hospital.

Nakuha kang Amarga ang armas lakip ang pakete sa gituohang shabu.

Matud ni Destura nga kanunay siya nagpahimangno sa mga drug operatives nga kung mahimo dili moabot sa duguon ang drug bust apan kon mosukol gyod kinahanglan protektahan sa kapolisan ang ilang kaugalingon.

Apan giklaro sab niini nga ubay-ubay napod ka drug bust ang ilang gipahigayon diin wala misukol ang mga suspetsado hinungdan nga sa prisohan ang ilang gipadulngan.


VIEW COMMENTS