MASAKSIHAN unyang alas tres sa hapon ang koronasyon sa 11 ka mga dilag nga apil sa Hiyas sa Kadayawan 2018.
Ang mga nahisgutang kababaihan, nagrepresenta sa 11 ka tribu nila, magtigi sa korona sa koronasyon nga himuon diha sa RMC Filoil Flying V Event Center Lopez Jaena St. dakbayan sa Davao.
Mga kandidata karon nga tuig; Chiary Balinan, 27, Ata Tribe; Karen Joy Dowing, 21, Bagobo K’Lata; Lovern Jorich Bio, 24, Bagobo-Tagabawa ; Monera Mande, 19, Matigsalug; Hanna Agujitas, 23, Obu Manuvu; Juhaira Omar, 19, Iranun; Nes-Ann Braem Naraga, 22, Kagan; Norjanah Mohamad Sirad, 27, Maguindanaon; Sittie Aisha Hadji Salim, 20, Maranao; Tata Dolina B. Ambo, 19, Sama; Rahma Balihani Musa, 22, Tausug.
Karon nga tuig sab, giatangan ang bag-ong korona nga nagrepresenta sa usa sa hiyas sa Davao, ang Waling-Waling o Vanda sanderiana.
Ang Waling-Waling, nga endemic na sa Mindanao, giila nga reyna sa mga orchids, gihimo sab kining icon sa dakbayan sa branding niining 'Life is Here.'
“This year’s Hiyas ng Kadayawan crown is grander and more functional,” suma ni Dan Salvana, Jr., Hiyas ng Kadayawan events director.
Dugang ni Salvana nga ang desinyo sa korona sa Hiyas ng Kadayawan naga-usab kada tuig, way permanenteng pattern nga gisunod niini.
“We wanted to have a crown that is inspired by the festival. We also wanted it to be more colorful,” dugang niya.
Si Tres Roldan Cartera maoy midesinyo sa bag-ong korona sa mga Hiyas, gamit ang mas gaan nga materyales, sama sa rhinestones.
Ang Hiyas ng Kadayawan Grand Winner modawat sa labing dako nga korona, samtang ang runners-up modawat sa susama niini, apan sa mas gamay nga porma. (Uban sa taho sa CIO)