SECTIONS
Thursday August 16, 2018
SUPERBALITA DAVAO

Editoryal: Angayan tagaan og pagtagad

TINGUHA sa City Transport and Traffic Management Office nga makunhoran ang kahuot sa trapiko dinhi mismo sa downtown area ning dakbayan sa Davao.

Gani gipatuman na sa buhatan sa pipila ka mga dapit dinhi ang 20-segundos nga patakaran sa pagpasakay ug pagpakanaug sa pasahero aron nga malikayan ang paghuot sa mga sakyanan, ilabi na gyud mga depasaheroang dyip.

Hinuon, maihap pa ning panahona ang mga lugar nga gibutangan og karatula nga dunay pahibawo nga 20-segundos lang ang tagal sa pagkarga o pagpakanaug og pasahero.

Apan naglaum ang CTTMO nga madugangan pa ang mga lugar ipatuman ang maong patakaran.

Makita ang mga karatula sa may dalang Claveria ning siyudad ug sa may Magallanes.

Tinguha nila nga himuon kini sa pipila pa ka lugar sama sa may McArthur Highway sa habagatan ug sa amihanan ning siyudad.

Nindot kini nga lakang gumikan kay way molalis nga nagkaguot na gyud ang dakbayan sa mga sakyanan, ilabi na nga hagip-ot ang mga dalan dinhi.

Gani ang two-way kaniadto nga mga dalan sama sa dalang Claveria ug Magallanes ug daghan pang uban, gihimo nang one-way karon aron nga lapad ang maagian sa mga sakyanan.

Apan ang wala lang makita sa CTTMO nga usa sa makadani nga mahuot ang mga sakyanan, ilabi na sa mga depasaheroan mao ang mga dispatser.

Ang mga dispatser mao kadtong mga tawo nga manawag og mga pasahero ug mopasakay sa magturno nga dyip.

Makita nato kini sa mga dalang Quirino, duol sa Generoso Bridge sa may Bankerohan. Diha sab sa may Crossing Matina ug sa pipila ka mga malls dinhi sa dakbayan.

Tingali angayan kining hatagan og pagtagad sa CTTMO aron nga di matental ang mga dyip nga moturno kon tinguha gyud sa buhatan nga makunhuran ang kahuot sa trapiko sa dakbayan.

Di na man tingali kinahanglan nga dunay dispatser kay mga pasahero mahibawo na man kon asa mosakay ug kon unsay ilang sakyan pauli sa ilang tagsa-tagsa ka destinasyon.

Bisan tuod kon nakasabot kita nga panginabuhi kini sa mga dispatser, apan unta makasabot sab sila sa tinguha sa dakbayan nga mapahapsay ang dagan sa mga sakyanan aron nga makubsan ang kalangay sa biyahe ilabi na gyud sa mga sumasakay.


VIEW COMMENTS