NAKONTROBERYAL ang medical assistance sa Child Sanitarium Hospital sa kongresista pa si Luigi Quisumbing. Salawayong balaodnon nga nag-usab sa probisyon pagtangtang sa tax exemption sa kooperatiba. Giingong wala makasumada sa P210M PDAF sa 2011-2013. Nasaag pagtugyan sa Luzon nga mibobo og P1.650M sa Kabuhayan at Kalusogang Alang sa Masa Foundation ug Kasanga sa Magandang Bukas Foundation. PDAF ug DAP tua mahapunta sa NGO nga dili kang Janet Lim Napoles nga alang unta sa National Commission on Muslim Filipinos. Didto ang 3M pesos sa Sinag ng Kaunlaran at Pag-asa Foundation. Nalakip sa 28 ka mga kongresista nga miimbudo sa ilang PDAF sa mini nga NGO ni Godofredo Roque nga gipaagi sa satellite agency sa Dept. of Agriculture nga mao ang National Agri-Business Corp., Technical Resource Center, Phil. Carabao Center ug National Agricultural ang Fishery. Gikan sa iyang PDAF ang P4.731M nga gipalit sa 19 ka ambuvans nga giapod-apod sa ika-unom nga distrito. Gipaagi sa Kapitolyo nga girelis sa DBM sa Nob. 16, 2011. Natiktikan sa COA nga wala moagi og subasta kay direktang kontrata sa Porta Coeli nga gipanag-iya ra sab sa pamilyang Quisumbing. Si Roberto Lebata mipasaka og 11 counts of graft and corruption ngadto sa Ombudsman sa pasangil nga mipalit og 107 ka muti-cabs sa 2011-2012 nga P250,000 matag usa sa ila ra usab nga Norkis Group of Companies maong gikwestyon kay conflict of interest. Si Bert Emphasis, kanhi kawani sa Norkis midason nga kwestyonabli ang pagpalit sa multi-cabs nga wala moagi og subasta. Matawag og bukid kining tanan apan wala mamatud-i.
Kadtong video nga nagsud-ong si Quisumbing sa mga babayeng nagbikini nga nagsayaw-sayaw sa pribadong party sa yate dili isyo. Giimbitar ra ang mayor. Isyo lamang kon mga lalaking hubo ang gipahiyoman. Labaw pang dili isyo ang pag-aslom sa ilang politikanhong relasyon ni Rep. Jonas Cortes nga gikatahong moparang pagka-mayor kay ang pirmaninting butang sa politika mao man ang kausaban. Nahinomdom mo nga giluiban ni Cortes ang mga Ouano nga maoy nag-agak niya. Sa dihang napiling mayor iyang gipabungkag ang heritage plaza nga gihagoan sa mga Ouano. Naligdas ang monumento ni Justice Terong Cabahug. Wa ilha ang Mandaue City College kay nagtukod og laing publikong kolehiyo. Gipakatulog ang drainage master plan. Natanggong ang New Mandaue North Reclamation. Wa matuman ang People Center ug Global Central Project kay gipalit ang CICC. Merkado sa Tribunal nga migasto og P500M nga giguba sa linog wa ipaayo kay nagtukod og bag-o sa giabandonar nga daang merkado pinaagi sa pagpangutang og P400M sa DBP nga unta naa ang Public-Private Partnership nga walay gasto ang gobyerno.