SECTIONS
Saturday August 18, 2018
SUPERBALITA CEBU

Tumulak mosuporta gihapon sa PNP

DI makaguba sa relasyon tali ni Konsehal Dave Tumulak sa Cebu City ug Philippine National Police bisan pa man kon si Tumulak gilakip sa gisang-at niining kaso didto sa Prosecutor’s Office.

Si Tumulak gipasakahan og kasong grave coercion, obstruction of justice ug grave threats sa Criminal Investigation and Detection Group (CIDG) may labot sa giingong pag-ambush kang barangay kagawad Jessielou Cadungog sa Barangay Tejero niadtong Hulyo 30.

Atol sa insidente, si P03 Eugene Calumba kinsa angkas ni Michael Banua ang gipusil sa bodyguard ni Cadungog nga si William Macaslang nga niresulta sa iyang kamatayon bisan kon ang pulis wa makapabuto ug wa sab ma-establisar kon nihulbot ba kini sa iyang armas.

Gisalikway ni Tumulak ang pasangil sa CIDG ug niingon nga niadto siya sa lugar isip deputy mayor on police matters ug iya pang naluwas ang kinabuhi ni Banua kinsa gitabangan og kulata sa mga istambay sa Tejero.

“Sa akong bahin niadto ko sa area just to save the life of Michael Banua. Gipusasan siya daghan kaayo siya og dugo human siya gikulata sa mga tawo ug duna man gani toy ni-attempt ug nihamag og balik may nalang gani niabot ko ug ako gibadlong ang mga tawo ug gida namo sa hospital,” pasabot ni Tumulak.

Matod sa opisyal nga wa niya gipasakitan si Banua ug ang mga identification card wa niya gikuha inay gihatag kini sa on duty nurse sa CCMC ug iya ra usab gi-turnover kang Mayor Tomas Osmeña human wa kini dawata sa pulis.

“Saksi ang mga barangay tanod sud sa sakyanan sa barangay Tejero kuyog ang usa ka pulis amo siyang gihatod didto CCMC. Makapamutod ta niana base sa statement sa barangay tanod kay diha sila sulod sa pick-up. Ako diha sa likod nga bahin. Di naman mi masud sa pick-up,” dugang paghulagway ni Tumulak.

Matod sa konsehal nga padayon siyang mosuporta sa kapulisan ilabi na sa ilang mga panginahanglan kansang mga mehoras makuha sa siyudad. PAC


VIEW COMMENTS