GIPASANGINLAN si Mayor Tomas Osmeña sa iyang kritiko sa konseho nga giyak-an ang development application sa duha ka dagkong developer kinsa nakapalit og yuta sa South Road Properties sa niaging administrasyon.
Si Konsehal Joel Garganera nagkanayon nga kon wa pa babagi ni Osmeña ang giplano nga development sa Ayala Lands ug SM Prime Holdings Inc, nakamugna na unta og 100,000 ka trabaho ang dakbayan sa Sugbo nga maoy gisaad sa developer.
“Kaning 5,000 ka mga trabaho nga maoy pasiatab sa mayor gi-drawing pa ni, naa ra ni sa Facebook pero mosobra na sa duha ka tuig iyang gilingkuran ang development application sa consortium sa Ayala ug SM nga supposedly after two years (2018) nahuman na unta na,” padayag ni Garganera.
Iyang gihulagway nga ang gibuhat ni Osmeña aron pagtabon sa iyang pagbabag human iyang gipabuhagay nga makamugna og 5,000 ka mga trabaho ang P18 bilyones nga development sa Kawit Island ubos sa pagdumala sa Universal Hotel and Resorts Incorporated.
“He is trying to focus on this as a diversionary tactic because mahuman nalang ning 3 years wala siyay employment nga na-generate pero dako siya gihimo pagbabag sa employment,” dugang ni Garganera.
Gipasabot sa konsehal mao ang pagbaligya ni kanhi Mayor Michael Rama sa 45 ektaryas nga yuta sa SRP niadtong tuig 2015 nga nihalin og P16 bilyones.
“We could have already accepted jobs from the call center and other businesses kay ang projected jobs diha is 100,000. In other words this 100,000 are real ang iyang 5,000 which will come 9 years after,” dugang sa konsehal.
Si Garganera, Konsehal Raymond Garcia ug Joy Pesquera naghuwat sa himuon nga lakang sa administrasyon human ni-adjourn ang session sa konseho niadtong Martes nga gikwestyon sa kampo sa BOPK diin si Labella ug walo ka konsehal namiya sa session hall ug nibalik ang session nga gitambungan sa mga konsehal nga kaalyado ni Osmeña.
Ilang giaprobahan ang paghatag og gahom ni Osmeña pagpirma sa memorandum of agreement tali sa UHRI ug ang paggamit sa landfill sa barangay Binaliw kansang resolution gisalikway na sa niaging Sanggunian. PAC