SECTIONS
Friday August 17, 2018
SUPERBALITA CEBU

Resort sa Lapu gisung

BUTO-BUTO sa armas ang nipukaw sa mga residente sa Barangay Agus, Lapu-Lapu City kagahapon sa kadlawon sa dihang armadong mga lalake nga luwan sa usa ka puti nga van nisulong sa Mactan Isla Resort and Casino.

“Pag-abot nila, diretso ti-on sa mga guwardiya (Blue Breed Security Agency), dayon ilang gipang-disarmahan,” saysay ni Senior Superintendent Limuel Obon, hepe sa Lapu-Lapu City Police Office, base sa ilang imbestigasyon.

Nahitabo ang pinusilay sa dihang ang guwardiya sa maong establisemento nga diha sa sud nakakita nga gipang-ilogan sa armas ang iyang kaubanan ug nipabuto.

Ang mao nga armadong mga lalake nga nagsul-ob og itom nga polo shirts ug karsones giingong gi-recruit sa Proceed Security Agency aron ipuli sa kasamtangang security force sa Mactan Isla ubos sa laing management.

Duha sa mga sakop sa Proceed, ilabi na ang ilang over-all security officer nga si retired Philippine Army 2nd Lt. Alberto Elola, samdan sa wala nga dughan ug laing wa mailhing security officer natapsingan sa bala sa iyang tuo nga bukton.

Usa sa mga guwardiya sa Proceed Security Agency (nagdumili sa pagpa-ila), nitug-an sa Superbalita Cebu nga kagahapon lang sa kadlawon sila nidunggo gikan pa sa Cagayan de Oro City diin sila gi-recruit ni Elola.

Gipasaligan sila og taas nga suholan nga P600 ang inadlaw kon magpasakop sila sa ahensiya kay nagkinahanglan og bag-ong guwardiya ang usa ka hotel sa Cebu.

“Pag-abot namo (pantalan), gidala dayon mi sa hotel (Mactan Isla). Wa gyud mi kahibawo ani. Panarbaho ray akong tuyo,” matod sa usa sa mga guwardiya dungan sa pagtudlo sa iyang bag nga gisudlan sa iyang ilisan nga giipon sa mga ebidensiya.

“Wa gyud mi mobawos og pusil. Kadto ra si Elola ang nisulod (gate),” paambit sa usa sa mga dinakpan nga sikyu.

Mga 33 ka security guards sa Proceed ang gidala sa police headquarters sa Lapu-Lapu diin sila gikuhaan og finger prints, paraffin test, profiling ug mugshot.

Samtang adunay 14 ka mga security guard sa Blue Breed gipaubos sa paraffin test aron pagtino kon si kinsa kanila ang nakapabuto.

“We will be filing appropriate charges against them (Proceed), including sa nag-lead sa ilaha diha,” matod pa Obon.

Sumala pa sa police official nga ila sab nga ipaubos sa imbestigasyon ang sakop sa Blue Breed ilabi na nga adunay nasamdan sa karibal nga sikyu.

Sa pag-imbentaryo sa mga armas nga nasakmit, moabot sa 22 ka mga armas ang nasakmit.

Kini naglakip sa KG9 machine pistol, T9 semi-automatic pistol ug .45 caliber nga gihulagway nga di authorized nga i-isyu ngadto sa security guards.

Lakip nga nakuha ang walo ka mga .38 caliber revolver, lima ka 9mm caliber pistol ug unom ka mga shotgun.

Ang maong mga armas gikuhaan og serial numbers aron sa pagsuta kon lisensiyado ug ipaubos sa ballistic examination ngadto sa PNP Crime Laboratory.

Gipahibawo ni Obon nga status quo ang sitwasyon sa Mactan Isla nga nagpasabot nga magpabilin ang kasamtangang management ug security guards.

Adunay upat ka Special Weapons and Tactics (SWAT) Team ug personnel gikan sa Police Station 4 ang gi-detail sa area.

Nag-ugat ang kasungian gumikan sa matod pa panagbangi sa mga tag-iya sa Mactan Isla nga pulos Korean nationals.

Kasamtangan nga si Son Byung Cheon ang executive director sa Mactan Isla ug sakop sa Lapu-Lapu City Peace and Order and City Advisory Council for Police Transformation and Development.

Gani niadtong Hunyo, ni-donate og kitchen equipment nga nagkantidad og P2.3 milyones ang Mactan Isla alang sa Hospitality and Management Department sa Lapu-Lapu City College.

Samtang si Attorney Gerardo Carillo, nagsilbing legal counsel sa Park family, nga matod pa orihinal nga tag-iya ug buot mobawi sa pagdumala sa establisemento nga nisangko sa korte.


VIEW COMMENTS