SECTIONS
Tuesday, July 23, 2019

Mongaya: Kinsay maalyado ni Sara?

HUMAN sa kudeta sa Kamara ug pag-abli sa Hugpong ng Pagbabago ni Mayor Sara Duterte sa Siyudad sa Davao nga makig-alayon og ubang mga lokal nga partido sa tibuok nasod, nitumaw ang pangutana kon si kinsa ang mahimong kaalyado niini sa Sugbo.

Atong nahibaw-an nga sukad pa sa miaging tuig nga magtambungan ang mga tawo nga suod ni Mayor Duterte sa mga kalihokan sa Cebu Movement for Federalism kun Cemfed ug National Movement for Federalism kun Namfed ni Mayor Aljun Diamante ug MMDA chief Danny Lim.

Apan kinsa kaha ang paboran sa grupo ni Mayor Sara sa mga politikanhong grupo dinhi sa Siyudad sa Sugbo? Ang BOPK ba o ang Barug Team Rama?

Barug

Nakahibawo na man kita nga pipila ka bulan nga milabay, si Presidential Assistant for the Visayas Mike Dino maoy niabi-abi kang Mayor Sara sa usa ka pagbisita sa Sugbo. Sa usa ka press conference, atong nakita nga kuyog ni PA Dino ang mga kaalyado niini sa Siyudad sa Sugbo nga sila Bise Mayor Edgar Labella ug pipika ka konsehal.

Dayon karong bag-o kay niingon kini si Labella nga ilang hisgutan pa sa Partido ang posibilidad nga makig-alayon sila sa Hugpong ng Pagbabago.

Sila na ba gyud kaha ang paboran ni Mayor Sara? Basin. Sa pikas bahin man gud, nakita nato nga nawala sa passing silang PA Dino, Labella ug kaubanan kadtong niadto kini sa kaulohan dihang gipahigayon ni Presidente Duterte ang iyang SONA.

Dayon, maayo ba mobalhinbalhin og partido? Sa miaging Nobiyembre 17, 2017 lang gani sila nanghurar sa PDP-Laban gikan sa UNA?

Unsa man say mahambog sa Barug Team Rama nga politikanhong kadaugan? Unsay ilang jewel nga dawaton man sila sa Hugpong? Di sab malimod nga wala pa gyud tangtanga ang ngalan ni kanhi mayor Mike Rama sa giingong drug list. Sakop sab nila ang usa ka politikanhong kaatbang ni Presidente Duterte nga si Konsehal Jun Alcover.

BOPK

Duha ka adlaw sa wala pa ang SONA, gitawgan na ni Mayor Sara sila si Kong. Raul del Mar ug Kong. Bebot Abellanosa nga mopirma sa usa ka resolusyon nga nagtinguhang matangtang si House Speaker.

Mahitabo kaha kining pagsalmot nilang Kong. Raul ug Kong. Bebot sa kudeta kon walay pag-uyon ni Mayor Tomas Osmeña? Gani, daw nanghinaot pa ang mayor mga molampos ang pagtangtang kang Alvarez.

Sa paglusad sa ABAKA nga gipangulohan ni Cabinet Secretary Jun Evasco didto sa Tagbilaran, Bohol, apil sa mga dinapit mao sila si Mayor Sara ug Konsehal Margot Osmeña.

Sa interbyu sa Rappler sa miaging adlaw, nagkanayon si Mayor Osmeña nga nakauyon siya sa style ni Mayor Sara. Samtang di maayo karon ang relasyon ni Osmeña sa kapulisan nga gituohang nagtuman lang sa mando sa ibabaw, maklaro nato nga suporta sa mga Sugboanon anaa sa mayor.

(@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph